發哥難忘獲關照子丹讚流芳百世

周潤發：「好愕然，希望佢老人家走得唔辛苦。雖然十幾年冇見，但以前一齊喺新藝城工作成日都見面，早幾年佢攞金像獎終身成就獎，我都好戥佢開心！最難忘係合作由佢執導嘅《老虎出更》，我唔係武行出身，佢特別幫我度啲可以突出我身手嘅招式，佢好照顧身邊人同提攜後輩，係電影界之寶。」

甄子丹：「心情難過，自細睇劉師傅電影長大，佢係影壇『一代宗師』，流芳百世。」

徐克透過助手說：「劉家良係一個好認真好專業嘅人，對佢嘅去世我好惋惜，亦係電影界嘅損失。」

惠英紅：「好突然，希望佢走得安詳冇痛苦。佢係我恩師，當年開戲搵我做女主角，造就咗我打女形象。佢好肯教新人，印象最深刻係佢同我講做演員唔止講個樣，仲要有身體語言、動作，佢仲畀機會我參與配音、後期剪接、拍攝。我拎第一屆香港電影金像獎最佳女主角部《長輩》，都係佢執導。」

曾志偉：「之前誤傳劉師傅死訊，我將想講嘅嘢寫出嚟，一邊寫一邊喊！依家收到呢個消息，覺得好難過！係劉師傅帶我入行，我有今日嘅成績，全靠佢！佢係一位好有義氣，好值得大家尊敬嘅人，尤其佢武術上嘅造詣，更加無人能及！今日電影業界有好多組織包括演藝人協會、導演會、武師會、編劇會同剪接師會等，都主動表示希望為佢身後事出一分力，可見佢喺行內幾受尊重。」

成龍:「哎吔！我真係唔知！好多年前同佢合作《醉拳Ⅱ》，雖然生老病死係人必經，但都覺得難過！」

唐佳：「相識五十幾年，廿幾歲同佢同撈同煲。當年佢係劉家班阿頭，聽到呢個消息個心好唔舒服。」

陳德森：「我開拍英皇電影《一個人的武林》目的係向武打巨星致敬，第一個就諗起佢。我當時聯絡過佢，佢話每日要有充足睡眠休息，咁我都唔想佢咁辛苦。劉家良威名一生，沒有白活，係電影界嘅奇迹，將來香港功夫電影唔會將佢遺忘。」