苟姑娘狂電「人夫」梁烈唯

華姐冠軍苟芸慧入行後緋聞不斷，早前被指介入舞台王者郭富城與名模熊黛林的戀情，心情Down爆但幸得好友支持，當中風趣幽默的梁烈唯可謂最得她歡心。兩人多次合作演情侶，苟姑娘曾認對唯唯有好感，雖然對方已有拍拖十年的女友Tina兼被拍到揀婚戒，但她仍不避忌，趁到長隆拍特輯時放足電！

護花以身擋屎

當日，兩人先到動物園拍攝《反斗紅星放暑假－長隆非常任務》幫河馬刷牙，唯唯搞笑唱求婚歌引河馬上水，氹得苟姑娘爆笑，卻聽到河馬「耳都側」，其中一隻更突然轉身向兩人大解！唯唯即Man爆以身擋屎，冧得茍姑娘雙眼放光！其後，他倆成功埋「牙」，但苟姑娘只掛着向唯唯放電，完全當河馬Liza冇到。唯唯似乎相當受落，High爆扭Pat幫Liza刷牙！近距離目擊的Liza心情當然不太靚，怒將牙刷咬斷宣示不滿！導演見兩人愈玩愈Close，順勢即場加咀戲，兩人亦爽快答應借位扮Kiss，毫不尷尬！據知情人士透露，「苟唯」全程黐到實，苟姑娘更趁不用埋位時拉唯唯到一角咬耳仔，態度親密！

記者昨日向苟姑娘求證，她表示放電只是戲劇效果，與唯唯關係如兄妹：「我好欣賞唯唯咁專一，我同Tina都會約飲茶！（電到佢暈陀陀？）我哋要扮情侶，佢識搞氣氛啫！」唯唯則讚苟姑娘電力十足，自言已有未婚妻心如止水：「可能係觀眾覺得我哋襯。（有冇動心過？）冇，我清心寡慾！（Tina有冇擔心？）唔會啦！」

否認體重150磅

另外，苟姑娘昨日被指因減肥不成，遭纖體廣告商無奈抽起廣告而找來劉心悠頂上，對此她說：「我冇聽過廣告商有不滿！我雖然冇磅重，但我唔覺會有150磅！（咁有冇瘦到？）瘦唔瘦由觀眾去睇，唔係自己講，依家都有Keep住早起身去拉筋，睇中醫調理身體，之後仲會開《飛虎2》，想唔瘦都唔得。」至於劉心悠的經理人公司發言人則說：「心悠近期都冇接到纖體廣告，而苟芸慧嗰個廣告，我哋好多年前接過，當時苟芸慧仲未出道。」