霆鋒500萬勞斯萊斯贈四哥

現年32歲的謝霆鋒除是「PO朝霆」製作公司CEO外，一向投資有道的他年前已斥資在中環擺花街購入多個旺舖，於短短八年間躋身億萬富豪行列。早年霆鋒以700萬元購入位於干德道金徽閣的二千多呎豪宅給父親住，今年卻以2,700萬元賣出套現，帳面已淨賺2千萬元。賺到錢的霆鋒不忘孝敬父親，安排四哥入住月租逾十萬元的陽明山莊，最近還購入一部價值500萬元的富豪級座駕勞斯萊斯，並聘請司機方便父親出入，新車還掛上以廿多萬購入的車牌「RR4」。

昨日下午5時，四哥坐新車於金鐘歎茶後，由司機接載往中環。戴黑超、穿白色恤衫及肩膊上披了一件紅色外套的他，落車後見記者即一臉風騷，並主動揮手打招呼，提到霆鋒送新車一事，四哥高興地說：「梗係開心啦！個仔送架車畀我，但我覺得仲欠啲嘢囉！（欠咩？）欠筆退休金囉！（阿仔冇畀家用你咩？）冇呀。（驚唔驚拉姑呷醋？）唔會，拉姑都好開心。（阿仔有冇靜雞雞送嘢畀拉姑？）咁就唔知喇！佢做啲嘢都出人意表。（有冇帶兩個孫仔去遊車河？）梗係有啦！尋日先同佢兩個出去玩咗半日，兩個孫仔大個仔咗好多，冇乜扭計，霆鋒同栢芝湊兩個孫湊得好好，我好安心！」

車牌顯身份

問到現時租住豪宅，會否叫霆鋒送樓？四哥打趣地說：「唔會啦！我住多3、4年都百年歸老啦！買咩樓吖！」問到其車牌「RR4」有甚麼特別意思時，他指RR代表Rolls Royce，4字則代表四哥！而據運輸署資料顯示，70歲或以上的人士在申請或續領駕駛執照時，需有由註冊醫生簽發的體格證明書，證明駕駛者的身體狀況及視力適合駕駛才能獲發牌或續牌，且駕駛執照只能選擇1年期或3年期。黃國桐律師補充說：「年滿70歲嘅患病高危人士或視力程度欠佳嘅人，即使已持有車牌，亦應該向運輸署填表申報體格檢驗報告。」

另外，霆鋒前晚與友人到灣仔星街一間日本餐廳晚膳，至10時許，霆鋒夜麻麻仍戴住黑超步出，然後匆匆與友人乘七人車離開。