以透視低胸裝示人的千嬅，雖為全場最性感，但好似冇乜睇頭喎！

經常自嘲波平如鏡的楊千嬅，昨日以超低胸Look出席活動，被曾志偉取笑掉轉裙着，難得她不介意；提到老公丁子高被指整容變膠面，千嬅即力撐老公是俊男底，並揚言欣賞對方有責任感，並非單憑外表！

以透視低胸裝示人的千嬅，雖為全場最性感，但好似冇乜睇頭喎！

志偉（右起）與被取笑掉轉裙着的千嬅傾得十分開心，在旁的楊怡亦笑埋一份。

早前頸部受傷的楊怡正接受物理治療。

張曦雯以Deep V連身裙出席活動，搶去不少「峰」頭。

楊千嬅昨日出席第四屆《太子珠寶鐘錶精英盃》賽馬日，其他嘉賓包括藝人曾志偉、吳孟達、楊怡、國際華裔小姐冠軍張曦雯、名媛李桂蘭及利孝和夫人等。其中以一身透視低胸露腰裝示人的千嬅，被記者笑指為全場最性感，她說：「我都冇嘢睇，頭先志偉先話我掉轉衫着。（老公丁子高有冇話你着得性感？）佢唔得閒理我，今日休息都要湊仔，佢覺得我着衫唔馬虎就得！」而千嬅的右手戴上護腕，她表示因「媽媽手」復發，現時不可以抱囝囝，少接觸令囝囝不認得她，她說：「好心傷，個仔見到我好似見客咁，好識Social，話晒老竇做公關！」

撐老公冇整容

此外，對於有報道指丁子高膠面疑整容？千嬅即瞪大眼睛說：「我老公喎！佢眼袋大過手指公，點會靚仔咗？我之前先叫佢要搞吓個樣同個肚，張相係咪佢自己執相？如果佢有整，幫佢整嗰個真係失敗，斷米路。奶奶之前生日，老公仲叫我幫佢化妝遮眼袋，不過佢本身個底係靚仔，係都我整先啦！」她又笑指有家室的男人不用太英俊，並笑說：「我鍾意佢有責任感同膊頭，唔係個樣。」

而同場的楊怡首次下注買馬，卻落敗收場。談到早前入院一事，她表示頸部受傷：「頸椎第五六節凸出同有骨刺，依家開始做物理治療，醫生話係肌肉勞損，有人建議我游水，不過我唔識！」記者笑指她可有向曾是教生員的緋聞男友羅仲謙請教？她即表示對方只懂救人。