Lesley（左）與黃芷晴闖娛圈，靠努力謀生，拒收父資產。

頂着「星二代」光環的明星後代，有知名父母做後盾，星途較其他人平坦，但每個「星家族」背後都有本難唸的經，秦沛女兒姜麗文大呻爸爸名氣大嚇怕有意追求的異性。而黃日華女兒黃芷晴則大嘆收工後仍要接受華哥的地獄式演技特訓，有苦自己知。雖然有父蔭及遺傳的演藝細胞，但兩位「星二代」卻靠自己努力打拚搵錢，拒收「父」資產！

Lesley（左）與黃芷晴闖娛圈，靠努力謀生，拒收父資產。

Lesley與秦沛的父女情深。

Lesley（左一）不時出席叔父姜大偉（左二）的家庭聚會。

華哥經常特訓芷晴演技。

黃芷晴年幼時已跟父母一起出席活動。

正所謂「虎父無犬子」，姜麗文（Lesley）與姜文杰（Benji）遺傳了爸爸秦沛的演藝基因，除殺入樂壇自資出碟外，更加入香港電視拍劇過戲癮，原來Lesley三歲時已向爸爸透露想唱歌拍戲，誓要「食硬呢行飯」：「大家都知我由細到大都好煩，我會周圍叫人聽我唱歌，我啲Uncle、Auntie都知走唔甩，我大個一定會入娛樂圈。」

遙距教戲

娛樂圈雖然是一片是非地，但秦沛不僅沒有阻止乖女入行，更用視像鏡頭遙距教戲：「爸爸好支持同尊重我入呢行，仲不時問我有冇嘢想學。阿爸用開唔係方法演技，佢係一嗌Cut後就可以做番自己，好易抽離，佢有教我呢個方法。但呢排佢比較忙 我會係Web Cam做畀佢睇，佢會教我『對眼唔好眨呀』！」

秦沛在Lesley心目中是一個「超人」，但嫲嫲逝世時，她第一次見到爸爸軟弱的一面：「第一次見爸爸最弱一面，見到佢變到一個細路仔咁，我當時攬住佢、錫住佢。」雖然「星家族」對事業有幫助，但卻嚇走異性，Lesley說：「有帶過男仔畀阿爸過目，佢會睇對方有冇禮貌、問吓家宅，好似一個測試咁。所以我係冇香港男仔追我o架，以我所知，因為爸爸有名氣，有男仔講過『追Lesley？諗都唔好諗，如果唔係秦沛、姜大偉、爾冬陞（兩位叔父）同姜文杰都會打死我呀』。」

遺傳執着

她又大讚爸爸雖然是嚴父，但姜家上下的男士都是紳士：「因為我嫲嫲係一個好Sweet嘅北京人，從小教到爸爸、姜大偉、爾冬陞都好識尊重長輩同餐桌禮儀，我身邊男人都好Gentleman。」談到與爸爸最相似的性格，她說：「執着。因為哥哥同我唔肯用爸爸啲錢，我發誓一蚊都冇用過，爸爸成日都笑我哋遺傳到呢個性格，成日問我哋點解唔用佢啲錢呢，仲每日都想塞錢畀我。」

年紀輕輕的黃芷晴一入行便跟爸爸黃日華到香港電視拍劇，本以為是芷晴天生愛演戲，殊不知竟是華哥催谷入行：「讀完中七時，佢已經想我入行，但媽咪（梁潔華）覺得我應該繼續讀書，之後一畢業，爸爸就問我有冇興趣入行喇！」華哥盡力為愛女的演藝生涯鋪路，務求短時間內令芷晴盡得真傳，芷晴大爆放工後，華哥會做「私人導師」進行地獄式演技特訓：「爸爸好緊張，喺屋企會教我做戲、同我對戲，成日問我收晒劇本未，仲寫埋演員分析表，雖然我幾鍾意，但都有啲壓力。」她笑言每次華哥索取新劇本時，就像讀小學時「簽回條」。

示範夢遊

芷晴稱最深刻一次是華哥親身示範夢遊：「有次我要扮夢遊，就向爸爸求救啦！點知佢真係喺屋企着晒衫、扮夢遊畀我睇，好認真！有次我要扮頭痛，爸爸教我要超大動作打個頭，但我覺得有啲浮誇，有時都唔想聽佢講，哈哈。」不過，芷晴自言想靠自己幹一番事業，即使華哥經常主動「塞錢」，亦堅拒接受。華哥平日外表剛強火爆，更試過狂踩舊東家無綫，但芷晴卻指爸爸在家裏是「小男人」：「出面覺得佢好惡，喺屋企畀我同阿媽恰番轉頭。其實佢係一個好細心嘅人，得閒會去買日用品返屋企，好似一個住家男咁。」對於爸爸的火爆性格，芷晴說：「其實我都唔想佢咁樣，希望我出到嚟可以撳一撳佢。」

失戀爆喊

兩年前，芷晴因被男友「狠撇」而爆喊，最後幸得華哥摸杯底談心安慰：「最傷心真係嗰次，凌晨3點趴喺地下喊，最後入咗阿爸阿媽房喊。平時好少同爸爸講拍拖啲嘢，最後佢哋斟紅酒畀我、安慰我， 嗰次真係好Warm。」

後記：爆老竇私隱

「星二代」接受專訪時，難免會提及明星父母，相信讀者最關心的是，「星爸」在螢幕背後鮮為人知的一面，Lesley與芷晴各爆爸爸一個小秘密。Lesley透露秦沛原來是「打機迷」，經常機不離手：「阿爸係『憤怒鳥』嘅高手，每次過關都三粒星，有時我『卡關』，佢會主動幫我，我見到佢打機個笑容就好滿足！」

至於芷晴則大爆華哥是一個三分鐘熱度的人，興趣五時花六時變：「佢鍾意一樣興趣就會勁玩，我細個時佢成日摺銀紙，試過用一千蚊摺個菠蘿出嚟。到大少少，佢就開始玩穿珠，但穿穿吓又唔穿，前排愛上玩微博，結果係咁洗版！」不過，華哥多年來唯一不變的嗜好就是「玩接龍」。