Ann（左）選擇教新人儀態，而Carrie則培育小朋友。

模特兒是很多少女夢寐以求的工作，可惜「壽命」不長，故很多名模都紛紛轉型，何紫綸（Ann）和趙嘉懿（Carrie）便是其中兩位，Ann搖身一變成為形象導師，Carrie則開班教小朋友做Model。

Ann（左）選擇教新人儀態，而Carrie則培育小朋友。

Ann不介意身材輸蝕，與身材豐滿的模特兒行婚紗騷。

Carrie擁有幸福家庭，可謂夢想成真。（資料圖片）

Ann雖然喜歡湊仔，但目前會專注打拚事業。

Carrie有仔萬事足，難怪願意放棄事業。

何紫綸17歲已入行當模特兒，一轉眼已十多年，自覺儲夠經驗的她，決定把自己所學的教給下一代：「我前年已經轉緊型，開始對呢個圈攰喇！有啲懶，懶嘅意思係唔想再講嘢，反而想用實力幫人或幫自己搵錢，始終年紀開始大，係時候退去幕後，加上自己未有一個好好嘅結婚對象，所以會先努力工作。」Ann覺得模特兒其實很難找另一半，故現時別人問她職業是甚麼？她回答是形象導師，她笑言轉了職業後，異性緣雖然提升了，但仍少人追求。

內地阿太富貴

問到可會羨慕好姐妹Carrie擁有幸福家庭？她說：「又唔會，但戥佢開心，由細識到大，到佢有個小朋友，經歷好多，佢小朋友好錫佢，真係上天安排畀佢嘅，我就隨緣啦！一急就唔成事，上天會安排一個最好嘅畀我，呢刻咪努力工作先囉，太過Focus拍拖，好多機會或者時間會投放落錯嘅事情。」她坦言趁現時還有魄力，會做喜歡的事，目前為三名新人當形象導師：「今年會真正開班教Model、教女仔儀態，會同個化妝師合作，宣傳方法將會好爆，但唔講得住，我想用最低本錢得到高效率。」而過往她曾以一對一的形式教儀態和餐桌禮儀，談到最深刻的教學經歷，她笑說：「我內地都有學生，內地嘅阿太真係好有錢，好肯使錢，最深刻印象係同個阿太掉晒啲衫，全部都係未着過嘅名牌，後來佢打嚟多謝我，話老公帶佢出街多咗，佢哋慣咗有錢只係識買名牌，但唔識打理儀表。」

慨嘆青黃不接

Ann透露轉型的另一原因，是有感香港模特兒圈青黃不接：「依家Model圈好細，中間嗰啲谷唔到上去，下面班妹妹又好性感，應該換番啲真係想做Model嘅，我唔介意佢細個或者唔夠高，會盡量教佢發揮潛力。國內好少有模，佢哋有一Group叫車模，真係行性感嘅，但唔會干涉行騷嗰班，位置好唔同，但香港好似倒後緊，我真係想做番啲嘢，其實香港好多女仔好靚，有時行街見到，我都會走去問吓佢有冇興趣做Model。」

Ann續說：「我明白模點解會性感，因為可以見報多啲，但開始混淆咗，以前我哋做Model，係要Sell件衫，你Sell性感做乜？」面對模圈風氣改變，她說：「個圈會覺得心痛，但我覺得幾得意幾好笑，有時出Event着婚紗，擺明我冇乜身材，記者會問我會唔會覺得輸蝕，我話是但啦！然後入後台食飯盒，已經開始唔會再理呢個爭鬥。」她自言只想做好本分：「依家唔使有太多曝光率，太多反而變得氾濫，想個客留意我工作而唔係我嘅花邊新聞。」

趙嘉懿同樣17歲入行，外表冷艷的她其實個性很可愛，而且愛心爆棚，今年決定開班教小朋友做Model，因為她自覺是時候轉型：「始終我3字頭，Model壽命唔夠長，係時候做唔同嘢，有咁嘅機會時間再唔做嘅話，過多幾年就會遲咗。」加上入行多年，Carrie認為有了知名度，對開班很有幫助：「做宣傳嘅時候，人哋都知你做過乜嘢，呢個係比其他人優勝嘅地方。」故她不會減少幕前工作。至於為何選擇教小朋友？全因她有一個3歲囝囝：「希望囝囝好Proud of me，有一日佢會話：『媽咪你好叻！』」

禁囝囝入娛圈

目前Carrie身兼多職，問到可會羨慕仍是單身的Ann？她即哈哈大笑說：「唔會，由細到大我都想搵到好老公，有小朋友，呢個係我個Dream，遇到依家呢個老公，我好滿足，真係覺得自己好幸福，又有一個小朋友，我真係好滿足。當佢兩個一人一啖錫我，我好開心！我個仔會同我講『I love you』，由細到大都係我湊佢，所以親子關係好好。」她又一臉幸福說：「當做嘢低落時，一返到屋企『叮噹』嗰下，囝囝嗌『媽咪媽咪』，即刻所有嘢放低哂，覺得其他事實在太濕碎，幸福家庭真係好重要！」

Carrie還踢爆囝囝想當Model：「佢細細個已經成日照鏡，會自己揀衫，出街會去衣櫃揀衫Mix and Match，有時又會話媽媽我想Gel頭，佢好貪靚。但我當然想佢第時有分專業工作，純粹玩吓做Model就OK，入娛樂圈最好唔好喇！」說時一副慈母模樣，難怪Carrie喜歡教導小朋友。她笑說：「開咗班1個月，4至6歲嘅小朋友反應唔錯，小朋友都好鍾意我，對佢哋要好有耐性，但又唔可以令佢哋太開心，開心得滯會發咗癲，控制唔到。我哋上堂有Shooting time，例如佢哋會學吓影雜誌要點擺Pose，等佢哋望慣鏡頭，唔會怕陌生，對訓練自信好有幫助。

狠批模界混亂

面對小朋友Carrie感到無比快樂，但對現時模界充斥模，她直言感心痛：「搞到好似我哋要Join Together，變咗唔夠Fashion，好混亂！呢種風氣For fashion就唔係咁好，For娛樂性就好高，唔同國家總會有Fashion，但香港好似突然間斷咗咁，缺乏咗呢樣嘢。」談到現時性感就可見報，她說：「太多新聞未必係好事，好大篇但負面嘅，人哋多數記得你唔好嘅事，好嘅嘢就會記得少啲。以我性格，我由細到大唔鍾意鬥，自己做到嘅人哋會知你有幾多材料，唔係成日騷身材，我哋冇身材，冇得鬥啦！哈哈。」

後記：事業為先

北望神州是現時趨勢，Ann亦看準時機開拓內地市場，但首要條件是學好普通話，故她現時每星期上三堂普通話班，問是否向女強人方向發展？她說：「我都好鍾意湊仔ｏ架，對住姨甥仔我母愛大發，但必須搵到自己事業先，我發現另一半都需要你要有少少事業成就。」

後記：家庭第一

Carrie表示由十三、四歲開始已想當Model，後來夢想成真可以周遊列國，加上外貌有東方色彩，令她在外國很受歡迎。她曾有機會到紐約發展，但誕下兒子後，放不下家庭，深思熟慮後，決定家庭第一。今年11月便是她與老公相愛10年，祝他們永遠幸福！