千嬅為Torres撲名校捱病

時下不少家長都緊張子女的前途，孩子未出世已開始搵定學校，BB剛出世又開始報名入讀學前班，難怪被稱為「怪獸家長」。今日是楊千嬅與丁子高的兒子丁進諾（Torres）一歲生日，原來兩公婆最近已着手為囝囝搵學校，日前千嬅派出老公外出「搜」校，約下午三時許，記者發現丁子高與一名男友人現身灣仔區，並於滿布Playgroup的大廈附近騰來騰去，期間又不停講電話，似向老婆問意見，其後又進入一間幼稚園索取資料。

有仔萬事足的千嬅，早前已為囝囝舉行動物生日派對，即使近日捱到病，大前晚亦不忘帶Torres與外公、外婆到中環食飯慶祝生日。晚上9時許，戴着口罩的千嬅從酒店步出，抱恙的她有仔冇得抱，全程與囝囝保持距離，眼仔睩睩的Torres由外婆抱住上車，而丁子高則充當司機駕車送眾人返歸。

揀一條龍幼稚園

其實千嬅自從成為金像影后之後工作更加繁忙，有不少劇本送上門，惟她只答應演出杜琪峯及彭浩翔導演的新作，早前因動小手術暫停拍攝阿杜新片的她，近日終於復工，與台灣男星周渝民（仔仔）拍對手戲，而錫仔錫到燶的千嬅，開工時只可透過手機視像與囝囝見面，難怪她表示盡量不出埠工作，以免錯失Torres成長的每一個畫面，近日又周圍撲學校，絕對是一個稱職媽媽！

昨日本報就搵學校一事致電丁子高，他說：「我哋已經搵咗兩間啱心水嘅Playgroup，到時二揀一，小學方面都揀過本地學校同國際學校，依家仲諗緊，因為想搵啲幼稚園一條龍直升上小學嘅！（太太有咩意見？）呢方面會聽我講，我以前讀聖若瑟，所以都想囝囝讀呢間！不過都要觀察吓個仔性格先，其實我想佢讀本地學校多啲，因為想佢有番啲壓力，等個仔有得來不易嘅感覺。屋企已經好多人錫佢，想嚴啲，讀書辛苦可以鍛煉吓佢！」

追粒女「龍馬」精神

問到是否當嚴父角色？他說：「但有時見到個仔就心軟。（努力追個女？）的確好想，但太太仲要拍兩部戲，上次佢有Torres時撞啱好忙，見到佢佗B好辛苦都於心不忍，所以今次追女會小心計劃，最想追個馬女，因為屬馬旺我，個仔屬龍，加埋就龍馬精神！」