梁麗瑩Man爆封女神

早前播出的「神劇」《神探高倫布》被觀眾狂鬧，但當中亦有一股清泉備受網友垂青，她正是在劇中飾演蕭正楠太太的梁麗瑩（Davily）！她所演的角色小鳥依人，故獲不少網友「派Like」封為女神。Davily默默耕耘多年，突然與岑麗香及苟芸慧等贏得同一稱號，坦言受寵若驚，並謙稱「不敢當」。她自爆外形嬌柔可愛，卻相當「男仔頭」：「我份人勁Man，驚網友會失望！我都幾硬淨，就算同人鬧交，都係之後匿埋先喊。（試過令追求者中伏？）咁開頭一定靜啲，冇耐會發覺我都幾大情大性，接受到嘅先會一齊。唔好話『呃』，當然都有唔少追求者做咗『兄弟』。」

鐵甲女俠強出頭

所謂「三歲定八十」，Davily自小已甚有「男子氣概」，經常為弟弟出頭，難怪會自封「女版鐵甲奇俠」！遇到不平事必會挺身而出的她說：「記得有次細佬畀同學搶走部玩具四驅車，我即刻走去理論，雖然對住成堆男仔，但都唔驚，我話會告發佢哋，終於攞番部四驅車！」

Davily發展不俗，憑《仁心解碼2》、《神》劇及飲食節目《街坊廚神食四方》等獲不少曝光機會，她主演的新劇《師父明白了》亦將推出，她表示滿意成績，但不敢奢望奪「飛躍獎」：「有人讚已經滿足，始終唔係經理人合約，不斷有演出機會就開心。」