已宣布掛靴的萬人迷碧咸（David Beckham）前日跟老婆仔女現身洛杉磯睇冰上曲棍球比賽，做全職「湊女公」！幾乎每場曲棍球賽都設有「Kiss Cam」環節，被鏡頭選中的觀眾要即場表演咀嘴，而當日抱着囡囡夏柏舒芬（Harper Seven）的碧咸便獲鏡頭選中，之前曾公開咀老婆Victoria的他今次大玩新意，選擇錫夏柏面珠一啖，場面溫馨！夏柏見到自己上鏡亦甚為興奮，即時用手指指向鏡頭，笑到四萬咁口，非常趣致！

同場還有碧咸老友「靚佬湯」湯告魯斯（Tom Cruise）、其養子康納（Connor）及歌手Justin Bieber。另外，有傳碧咸將於本星期到訪邁阿密，洽談有關成為美國職業足球聯賽新球會班主的事宜。