子珊（右）由經理人攙扶，返回錄影廠開工。

無綫花旦徐子珊本周一拍新劇《My盛Lady》撻傷尾龍骨，被送往將軍澳醫院急症室治療，獲監製放假兩日的子珊昨晚復工。她穿平底鞋返到錄影廠，步履明顯緩慢，但精神不錯，她說：「多謝關心，尾龍骨腫咗，照咗X光冇骨裂，醫生講笑話就算裂咗都打唔到石膏，手腳扭傷都冇乜嘢喇！（咁快復工﹖）醫生開咗幾日病假畀我，但自己覺得OK，唔想阻到大家，同埋呢幾日都係拍辦公室戲。（唔再着太高嘅高踭鞋﹖）唔夠高冇辦法，就算嗰日着平底鞋一樣會跌親。（黃子華內疚﹖）唔關子華事嘅，感激朋友、同事嘅安慰。」

子珊（右）由經理人攙扶，返回錄影廠開工。

問到撻傷尾龍骨可會影響生BB？她說：「當時都嚇親，淨係喊，冇問醫生。唔緊要啩！個醫生幾靚仔o架！」她指補戲會繼續親身上陣，還提議導演用她出事撻傷的片段「唔好嘥」。