子珊得知無大礙後鬆一口氣，但仍感痛楚，不時嘴扁扁。

無綫花旦徐子珊前晚在電視城拍劇時發生意外，穿上五吋高踭鞋的她被地上積水跣到攤攤腰，整個人凌空撻落地，屁股遭殃！她當時有十分鐘痛得不能郁動，嚇到黃子華等人急急送她入急症室。

子珊得知無大礙後鬆一口氣，但仍感痛楚，不時嘴扁扁。

子珊等候見醫生時與子華訴苦，面露難色狀甚擔心。

子華（右）送子珊入急症室後一直愁眉深鎖。

直至子珊離開急症室，子華輕輕拍其膊頭作鼓勵。

冇子珊陪的黃子華改與小寶攬攬，卻爆出鹹豬手笑話！

子珊上車時小心冀冀，以免痛楚加劇。

昨日原定出席劇集《My盛Lady》拜神儀式的徐子珊，還未來得及求神保佑，前晚為《盛》拍攝廠景時已經出事，認真當黑！子珊當晚拍攝向子華潑水的戲份，穿着五吋高踭鞋的她不慎被地上積水跣鑊甘，整個人失平衡撻到攤攤腰，撻低後足足有十分鐘痛得不能郁動及說話，子華與監製文偉鴻等見狀便急急送她入將軍澳醫院急症室治療。

手腳扭親 隱隱作痛

子珊到急症室後需坐輪椅等候見醫生，經治療後由經理人推着輪椅離開，雖然當時仍隱隱作痛，但她表示沒有大礙，隨後小心翼翼登車返家養傷。記者昨日致電問候子珊，她憶述當時情況：「其實NG完一次已經有拖地，但可能仲有水，結果着住五吋高踭鞋就跣一跣腳，成個人凌空撻咗落地，當時郁唔到驚到喊！照完X光證實冇骨折，但係尾龍骨個位腫咗，手腳又扭親，醫生開咗啲消炎藥畀我。」

同場拍檔子華昨日出席拜神時亦重提子珊受傷經過：「當時畀子珊嚇死，全廠靜晒，子珊嗰陣好痛，有十分鐘郁唔到、講唔到嘢喺度喊。（影響生仔？）唔敢提啦！休息吓應該冇事。（拜神前出事？）本來拍得好順利，真係估唔到，經過今次希望唔會再有意外發生。當時見到地下有少少水，但諗住拍咗先，第日真係要處理咗先，出咗事就難以挽回。」他又笑指原本打算與子珊昨日宣布組情侶合唱團到外地登台搵真銀，豈料發生意外。雖然子珊缺席，但子華不愁寂寞，與小寶抱抱影相，卻被取笑幾乎「鹹豬手」﹖他即笑說：「我唔會係冇意嘅。」

另外，監製文偉鴻指子珊雖然受傷，但不會阻礙拍攝進度，會先讓她休息一、兩日，戲份日後再補拍。據悉，子珊為免影響拍攝進度，今晚將歸隊復工。