失雲聰「叫雞」慢慢歎

本月4日，陳山聰一支公黯然由倫敦返港，越洋箍煲失敗，與賭王千金何超雲終極分手。自此潮山聰變為失雲聰，由昔日入住超雲的港島南區陽明山莊豪宅，遷回400呎九龍灣麗晶花園居屋，豪門夢碎的山聰變得如隱閉中年甚少見人，過其「四失中年」宅佬生活。4日前，超雲在中環拖型男「新歡」睇電影，無疑令山聰再次大受打擊。

昨晚約七時，山聰穿着白衣牛仔褲、戴帽及眼鏡，以一副頹爆宅佬打扮在哥哥Joseph陪同下，終願步出麗晶花園。見他甫上七人車即神情興奮，笑到面紅耳熱，原來他在哥哥揸車下直駛紅磡急「叫雞」煲慢慢歎。七人車直達紅磡民泰街的「一品雞煲火鍋」店門，山聰即時老饕上身般，雞咁腳入內點菜，並唔要堂食決定帶走慢慢歎。期間記者問他好耐冇見、近況如何時，山聰仍笑吟吟說：「幾好呀！」但當問到超雲新歡等問題時，他即時變回頹山聰，木口木面恍如未聞。

信用卡結帳

在等外賣期間，山聰突然拿起雞煲店的卡片予店外的記者拍照，並做出「呢間啲雞好好食」的口形，原來山聰今次食過翻尋味，早成熟客仔並落力推介。最後山聰以信用卡「先使未來錢」，買了六大盒外賣加一盒醬汁，左右手共三大袋食物離開，記者問他往哪裏時，他心滿意足說：「食嘢囉！」他上車後直駛東涌Joseph寓所停車場，約十分鐘後兩兄弟再步出至附近的「Zentro Garden」酒吧隊啤。

名錶變膠錶

昔日與超雲一起時，山聰手戴卡地亞名貴定情手錶，但昨晚見他在酒吧中落Order時「手一揮」，如今已變成膠錶一隻，一切打回原形，連飲酒都要自費。他在Happy Hour的特價時段點了42蚊一杯的啤酒及Nuts一碟，與Joseph一人一杯啤酒互隊，見失雲聰神色落寞，飲到「嘔白泡」般成口泡，但幸而仍記得保持儀態急急搵紙巾抹嘴。

雖然舊愛超雲一向追求者眾並已有「新歡」，但頹山聰亦有自己的宅佬魅力，在酒吧中有外籍熟女見山聰有記者訪問即大感興趣，並上前搭訕，而頹山聰亦未有忘掉箍女功，氹得熟婦笑逐顏開。贏回一絲自信的山聰即時心情大靚，離開時問記者要不要飲番杯，在記者禮貌拒絕後，他又企定定任影唔嬲，其後兄弟兩人再一同返回Joseph的東涌寓所。