家強對親家世榮嗌唔制

今年48歲的黃家強跟年輕15年的日籍太太Makiko結婚後，於2007年誕下長子黃慶陽，前年再添一子黃曜陽。他早前宣傳下月舉行的九展騷時提及兩名寶貝仔，笑到瞇晒眼，還掏出手機晒兒子生活照：「大仔今年6歲，細仔就15個月大，大仔靚仔啲，人緣都好啲；細仔就似我醜樣啲，成個懵炳！我成日都話佢醜o架，但佢就聰明啲。」

恨生女收示愛紙仔

慶陽雖然年幼，但懂事兼重兄弟情，兩兄弟相處融洽，家強說：「我睇得出大仔好錫細佬，平時都會就個細，慶陽最唔鍾意細佬搞佢啲嘢，但我會教佢要遷就同錫細佬。」家強指他日與太太百年歸老，兩兄弟便要相依為命，所以要教他們相親相愛。

問到可會再追個女？家強哈哈笑說：「唔啦！再生就送去孤兒院，邊養得咁多個！一係東方報業集團基金贊助我啦！我又怕老婆唔肯，女人怕生得多，身材會走樣，除非一定係生女。」他又自爆恨女，原來是呷老婆醋！事緣有晚太太出席飯局，由他留家照顧寶貝仔。當他帶囝囝入房睡覺後，卻發現太太的房門貼了張寫着「Mama l love you」的便條，家強即向太太埋怨，但太太卻晒命：「佢話已經收咗六張呢啲紙仔！第二日我就收到一張，但覺得係老婆教個仔寫，唔係真心囉！」又自我陶醉指他日如有女，定必日日收到示愛紙仔。

前Beyond三位成員先後結婚生仔，問到可會跟黃貫中及葉世榮搞BB聚會？家強透露曾跟世榮提及。談及兩位好友均生女，他又吹水說：「等我兩個仔娶晒佢哋啲女，做我黃家媳婦！仲同啲媳婦講話畀佢哋啲老竇聽，依家老爺唔開心呀！哈哈，講笑咋！」家強與亡兄家駒音樂才華洋溢，家強指兒子亦愛聽音樂，但不覺他太有表演欲：「唔係好有表演欲，抒發自己真感情之嘛！」現時兒子正學鋼琴，因有助小朋友的左右腦發展。

葉世榮去年誕下可愛女兒，談到初為人父的感受，他說：「心情好興奮，好似自己進入人生另一階段，呢個階段感覺幾妙，有家庭、太太同小朋友，令我有咗方向同目標，其他嘢都可以唔計較。」不過，世榮卻遺憾未能親眼見證女兒「出世」的一刻：「佢出世嗰陣，我唔喺太太身邊，都幾遺憾！其實係有啲慚愧，當時我係天上，搭緊飛機去做嘢，老婆打嚟話生咗！我初頭仲有啲唔信，仲要做多一個星期嘢先可以返去見BB。」

不求跟老竇做歌手

世榮直言女兒遺傳了他的節奏感，年紀細細已經在家打鼓，似模似樣：「佢試過拎住兩條香腸喺度敲個奶粉罐，又鍾意聽啲節奏感強嘅歌。（教佢打鼓？）會試吓。」問到會否支持女兒做歌手？他直言不反對，但一定要為樂迷帶來正能量：「佢鍾意做咩就做，但要帶畀人正面訊息，唔可以做反叛題材嘅音樂。」

為人父母總希望子女出人頭地，問到世榮對女兒可有大寄望？他卻表示只求女兒做個好人：「希望佢大個做善良而有智慧嘅人，要有美德，人品係最緊要。（想佢嫁個有錢人？）搵個有緣人，唔一定好有錢，但一定要係好人，要孝順父母，連父母都唔孝順點可能係一個好人！」他自言不是一個緊張爸爸，不會管女兒識男友，只會從旁指引。

如今Beyond三子均成家立室，齊齊榮升爸爸，問到世榮會否與家強及黃貫中傾「湊B經」？世榮說：「我哋淨係喺微信嗰啲有傾過，真正傾就冇，加上個女喺內地，要見面難啲，我淨係睇過家強同Paul仔女嘅相。」提到家強曾笑言要與他對親家，世榮坦言現時女仔不喜歡年紀相近的男仔：「佢講笑啫！睇吓有冇呢個緣分，但依家啲女仔唔鍾意年紀太近嘅男仔，反而鍾意大十年以上嘅，覺得佢哋社會經驗多，成熟啲。」言下之意似無意與家強親上加親。

後記：天賜寶貝

家強坦言為令大子慶陽有個伴，足足努力了五年才有曜陽，他慨嘆：「生BB真係唔容易，真係好攰o架！刻意係冇用囉，之前同老婆夾晒時間，以為就容易啲有，點知都係計錯晒。BB係天賜嘅，以為買嗰啲嘢有幫助，點知買夠一打都係冇就係冇。」

後記：鐵漢柔情

葉世榮在台上大玩嘈到拆天的搖滾樂，但一談起女兒卻變成滔滔不絕的溫柔爸爸。搖滾與溫柔似乎是水溝油，但世榮卻不以為然地說：「Rock友都係人，提起BB都可以冧晒，外國好多Rock友生咗BB都係咁啦！」有女萬事足的他似乎用另一種方式呈現搖滾態度。