變身鬆弛熊的千嬅一圓兒時夢想，卻嚇親囝囝。

影后楊千嬅與老公丁子高昨日為快滿一歲的兒子Torres舉行動物園派對，兩人分別穿上鬆弛熊及大象服飾，盡顯童心，不少賓客亦變身動物贈興！千嬅與子高笑言Torres甫見他們的奇特Look感驚嚇，但亦乖巧地任影兩小時，完全冇扭計！　

變身鬆弛熊的千嬅一圓兒時夢想，卻嚇親囝囝。

大批好友Cosplay到賀，非常畀面！

千嬅一家三口化身動物，溫馨切蛋糕。

現場設有捐款箱，善款將捐給特殊學校的小朋友。

有份開P的林珊珊，高舉拇指讚好！

楊千嬅與丁子高的兒子Torres（丁進諾）快滿一歲，兩人昨日在金鐘某酒店大搞動物園派對，場外擺放了一張大型布景板，印有色彩繽紛的動物，並寫上「Welcome To Torres's 1st Birthday Celebration」，旁邊則有用氣球扭成的貓頭鷹及長頸鹿。丁子高昨午不怕尷尬以大笨象造型穿梭場地與職員溝通，千嬅則與Torres以「母子裝」鬆弛熊打扮亮相，雙方父母、好友劉浩龍、小美、張燊悅與兩名女兒、林珊珊及汪詩詩偕同母親與女兒等均有出席，席間賓客與壽星仔唱生日歌及切蛋糕，並爭相與丁家「三動物」合照，場面熱鬧！

派對後千嬅表示擁有動物園是其兒時夢想，故希望於囝囝生日時給他一個美好回憶，問到Torres是否玩得很高興？她笑說：「佢瞓咗兩覺添！依家先同個仔搞生日會係因為我之前好肥，唔想見人，所以冇搞百日宴，今次畀一班好錫囝囝嘅朋友見吓。（現場有捐款箱喎！）叫咗朋友唔好買禮物，寧願捐錢，我得到嘅嘢係社會畀我，所以會用個仔名義，將啲善款捐畀特殊學校小朋友。」問到Torres看見父母的動物Look有何反應？千嬅說：「哈哈！勁驚囉！今次體會到Cosplay好辛苦，我身上嘅汗勁過跑10公里，但長輩就免疫，叫佢扮動物以為我玩佢。」

埋單15萬

丁子高則大讚Torres乖巧，連續拍照兩小時都冇喊。而他其後在微博上載一家三口的溫馨照，並留言：「是我的，我的……寶貝親愛！」據知，在宴會廳開自助餐P人頭費約一千港元，故丁家昨日埋單至少十五萬元。現場亦有多個小朋友喜歡的攤位，如有藝術家繪畫人物肖像並將之印在環保袋上，亦有攤位讓家長將彩色沙入樽做紀念。丁子高更請來中學同學擔任扭氣球師傅，大受歡迎！