Cara G. Jesper 合體Power Up

C：Cara G. J：Jesper

C：好多朋友問我，結咗婚有咩唔同呀？同拍拖時有咩分別？我覺得結婚後個感覺同拍拖真係有唔同，更有安全感，好似同對方融為一體，不可分割咁，互相屬於對方，大家擁有同一個將來，會一齊為美好嘅生活努力，踏入一段感情嘅全新階段，令我覺得好開心，好興奮！

J：婚後感覺好好，好特別，有一種非常平靜、安寧嘅感覺，可以話Cara圓滿咗我嘅人生，呢種感覺係拍拖時冇嘅。

C：我啱啱先知原來有句說話係「結婚係戀愛嘅墳墓」，以前從來未聽過，好恐怖，咁我同Jesper咪即係要被埋葬？太得人驚，唔明點解會有咁嘅講法，完全唔認同。對我嚟講，婚姻絕對冇令我哋嘅愛情死亡，而係去咗另一個更高嘅層次，之前拍拖時我會有恐懼，唔夠安全感，有時會唔肯定將來係咪可以一齊走落去，依家我多咗份安全感，知道有另一半無限量支持自己，可以更安心去追逐夢想，唔會驚佢捨我而去。

J：我都冇聽過呢句說話，當然亦唔認同，我覺得婚姻係一段感情嘅突破，係愛情嘅昇華，真正令我哋兩個融為一體，分享彼此嘅人生。

開心Share冇交嗌

C：當我第一次遇見Jesper嘅時候，已經有一種「就係佢喇！」嘅感覺，覺得佢就係我嘅Mr.Right，好奇妙！我最鍾意佢一顆善良嘅心，對人好好，又肯幫人，一個人嘅本質好重要，內在美勝過一切。同埋佢對我真係勁Sweet，好錫我同支持我。

J：我第一次見佢時嘅感覺同樣好特別，覺得呢個女仔與別不同，好想同佢有將來，呢種感覺係從未有過嘅！

C：我哋拍咗拖七年先結婚，但冇經歷過所謂嘅七年之癢，咁當然會有Hard Time，一段關係中有高低潮亦好正常，最終都過渡到，因為彼此都好珍惜呢段感情。我哋基本上冇咩嗌交，係兩年前因為意見分歧而嘈過一次，之後大家冷靜咗，耐心傾番有咩問題再一齊解決就冇事。

J：我哋唔鍾意嗌交，咁係冇意思，只會破壞感情，對成件事冇好處。如果大家都想繼續一齊，應該平心靜氣傾問題所在，坦誠講出自己嘅感受同諗法，所以我哋有咩都會拎出嚟傾。

C：要Keep住呢份愛新鮮，就要不時畀驚喜對方，我會盡量去做多啲浪漫嘅嘢，Sweet啲！兩個人一齊生活咗咁多年，好多嘢已經變成習慣同例行公事，要記住不時做啲嘢氹吓對方，Surprise吓對方，製造啲小情趣。

J：呢方面Cara做得好好，佢係一個既浪漫又Sweet嘅女仔。我認為要Keep住一份愛，唔係在於你做咗啲咩，而係在於你點去對待對方，係一種態度。大家要互相尊重，分享共同嘅興趣，同埋打破例行公事模式嘅生活，唔好將愛變成習慣。

C：我哋成日因為工作周圍飛，有時一飛就兩、三個月，可以算係聚少離多，但我好慶幸咁樣反而令我哋更加掛住對方，見面時更加甜蜜，更珍惜共處嘅時光。

J：如果大家喺外地工作太耐，抽到時間嘅話我哋都會飛去探對方，順便喺當地玩吓，我哋一齊有太多難忘嘅回憶！

屋企行先啤幾件

C：我哋價值觀都好相似，家庭都係排第一位，我哋計劃最少生兩個BB，其實我都想生多啲，但睇吓我哋經濟能力可以負擔到生幾多個。

J：我心目中理想嘅畫面當然係Cara可以親自照顧番我哋嘅小朋友，而唔係由工人湊大，但都要睇番Cara自己嘅意願，佢喺事業上都有野心同目標，我要尊重佢嘅決定。

C：我成日都夢想可以成為一個完美嘅太太同媽咪，我並唔係一個工作狂，只係想擁有自己嘅事業，養一個小朋友真係好貴！唔工作賺錢太難負擔。我決定發展果汁生意都係為咗我將來嘅小朋友，自己做老細工作時間可以自己話事，會有更多時間照顧小朋友。

後記：愛是永恒

看見Cara和Jesper，不期然會想起張學友的金曲《愛是永恒》，當中一句「有着你便有着我，真愛是永不死……愛是永恒當所愛是你」，他們對彼此的愛從沒有因時間而流逝，反而讓愛變得更深厚。兩人拍照時完全不需要半點提示，已自動波上演幕幕甜蜜恩愛場面，絕對是真情流露的寫照。