朱玲玲四萬咁口認做嫲嫲

朱玲玲昨晚以高貴打扮出席《慧妍雅集「愛世界」慈善晚會》，問到新抱郭晶晶是否懷孕時？她即笑得燦爛：「你問番佢哋。（你笑得咁開心係咪真係做嫲嫲？）邊個做嫲嫲唔開心到笑！（準備咗乜畀BB？）冇諗，冇乜要準備，大肚嘅嘢都係問番佢哋。（怕BB小器唔講得？）係，佢哋咁大個人，自己宣布結婚，由佢哋宣布番個BB嘅事！」問到喜歡孫兒還是孫女，她笑言已生了三個兒子，但沒有女兒，故沒所謂。問到想媳婦生多少個？她說：「由佢哋決定，做父母大壓力，未必生咁多。（幫手湊？）幫手玩就得！（會送乜禮物？）未去到呢個程度，會送啲更有意義嘅嘢，唔講得住，多謝關心。」

她又透露晶晶現時香港及北京兩邊飛，目前則身處天津，問到會否叫晶晶多留意起居飲食？她說：「唔係大肚先留意，平時都要。（有冇約打羽毛球健身？）冇，我都少打咗，好難叫佢哋約埋陪媽咪。（幫晶晶影大肚寫真？）冇諗過，影都影BB啦，好玩啲！」

楊思琦Big爆搶鏡

而會長曹敏莉透露是次晚會已籌備半年，由選擇場地到布置都有參與。已懷孕四個月的她肚皮與懷孕七個月的袁彩雲差不多大，她說：「我有咗兩個月時個肚已收唔埋，預產期係九月底。」已有一女的她將湊個「好」字，問到是否兩個夠晒數？她說：「冇咁快諗，生完先算，小朋友係緣分，如再追都唔係仔女問題。」昨晚歷屆港姐傾巢而出，拍攝大合照時陣容鼎盛，楊思琦及陳法蓉谷胸上陣最性感。思琦透露剛完成音樂劇令身形消瘦：「瘦咗又Fit咗，但冇跌Cup。」陳法蓉稱將主力在內地拍劇，開拍由楊冪投資的電視劇，同劇尚有余文樂。問到會否回無綫拍劇？她說：「TVB冇聯絡我，王維基搵過我。」問到感情事，她指正選擇中：「寶物沉歸底，要慢慢揀，勉強會唔開心。」