Eason為學友做骨佬
「兩代歌神」張學友跟陳奕迅（Eason）昨日出席活動，Eason表現興奮，表情和小動作多多，又像小歌迷般躲在學友身後。Eason更送上「肩頸按摩」，連學友都大叫舒服！
Eason（右）難得與偶像學友同台，表情兼動作多多，開心到癲！
Eason幫忙按摩，學友嗌舒服！
小粉絲Eason怕醜得匿在學友身後。
Eason獲學友唱和音，令他非常得戚！
阿徐想參加十月的三藩市馬拉松，但老公擔心類似「波士頓襲擊」再發生。
張學友和陳奕迅兩位歌神昨日齊齊出席《太陽計劃2013．夢想啟航》啟動儀式。向來視學友為偶像的Eason，更像小Fans上身，不時流露出搞鬼表情。表現興奮的Eason合照時更「突然怕醜」，閃到學友身後又幫他按摩，連學友都忍不住問他：「咁係咪影得你瘦啲！」同時又大讚Eason手勢佳：「好舒服，人肉咕o臣呀！」
活動以鼓勵年輕人追尋夢想為主題，問到學友和Eason女兒的夢想，Eason稱女兒康堤目前在學習聲樂，未知會否效法他做歌手，學友笑說：「唔使驚，細個嘅夢想多數唔會達成。大女同我以前一樣唔知想做咩，細女反而對昆蟲有興趣，話想做科學家。」
唱到喉嚨震
兩人合唱活動主題曲，Eason自言夢想跟學友合作，終願望成真；反而學友稱沒太大反應，並取笑：「呢個就係出道早十幾年嘅分別。」 兩人首次一同錄音，Eason面對面看到學友唱歌，大開眼界：「好興奮見到學友唱到喉嚨震，連自己都震埋！」
錄音當日學友首先到場，Eason則因工作關係遲了近一小時，記者笑Eason跟偶像錄音竟敢遲到，他說：「咁咪證明我係一視同仁！」學友亦幫口解圍：「呢個係港人嘅價值，冇種族歧視同階級之分！」兩人又自爆曾爭唱歌曲和音，結果學友成功搶贏，Eason亦不執輸：「有學友幫我唱和音，幾勁呀！」
另外，Eason太太徐濠縈前晚出席活動時透露，母親節時收到囡囡親手製作的賀卡和花，令她甜在心頭！因當晚Eason有工作在身，故跟囡囡叫外賣撐枱腳。
