有愛情滋潤的Kary心情大靚，不時甜笑。

歌手吳雨霏（Kary）被《好報》獨家影到與余文樂及好友食糖水，昨日她出席音樂會綵排時，大方承認已與未來奶奶食過飯，並以「樂嫂」姿態說：「佢有聚會都會主動叫埋我去﹗」

有愛情滋潤的Kary心情大靚，不時甜笑。

Kary（左起）、薛凱琪、王菀之及林二汶為音樂會綵排。

吳雨霏日前被《好報》影到與余文樂及其好友齊齊食糖水。

吳雨霏日前被《好報》獨家拍得獲余文樂急召入西貢，與「樂妹」余文琪及好友食糖水。獲男友高調確認女友身份，Kary即以「喜愛夜蒲」Look現身，期間又風騷地與眾人打成一片，升呢成為「跟得樂嫂」，還氹得樂仔「出手」拖實上車作獎勵，讓她名正言順安坐「樂嫂」寶座。

認男友主動邀約

Kary、薛凱琪、王菀之及林二汶昨日齊齊為音樂會綵排，問到Kary行「奶奶政策」成功「入屋」時，她含蓄地說：「唔好咁叫Auntie，禮貌上要對佢好啲。大家有見過幾次面，有食過飯，都係正常見面。（奶奶鍾意你？）唔知道呀！不過大家久唔久會見面。」記者再追問她是否已融入樂仔的生活時，她即甜笑直認樂仔有聚會都會「叫埋佢」：「有時兩個人見到雙方嘅朋友或者家人好正常，有時佢有聚會都會主動問我去唔去，有時間我就會去。（你好遷就樂仔？）適當嘅遷就係需要，同埋我個人又冇咩所謂。不過近排好忙，都好少見。」而記者昨日亦有致電樂仔，他全程笑笑口說：「私人嘢唔回應。」

其實Kary能夠穩坐「樂嫂」寶座並不容易，據知她憑獨門箍仔四招才成功「入屋」，她先後行「奶奶政策」及「姑仔政策」，成功冧掂男友最疼錫的母親及妹妹，並練成「百忍成金」術，任由男友到外地開工或睇靚車，她又會隔空撒嬌，不時於社交網匯報近況，令向來低調的樂仔亦公然在網上留言冧女友，認真愛得纏綿！