鄭欣宜經過一輪心理掙扎後決定自薦,在紀念媽咪沈殿霞(肥姐)的個唱上作出高難度表演,並預告騷上會有亡母生前的絕密片段曝光。為免在台上慘變喊包,她表示已在家中「打底」狂Loop有關片段,連26歲生日派對亦要放埋一邊!

鄭欣宜昨日穿上有黑色魚網袖的上衣到電台接受訪問,宣傳將於下月1日(即肥姐生忌)舉行的「開心果永遠欣想妳演唱會」。初踏紅館的她透露一直銘記肥姐的座右銘:「記得媽咪講過無論八歲、十八歲定八十歲,都要不斷有新嘢試,挑戰自己。」因此,她決定自告奮勇,在騷上作高難度演出,但大賣關子:「唔講得住,不過係要練嘅,同埋都有心理掙扎!」

跑步練氣防失準

仍未成功收身的欣宜表示有跑步練氣,積極備戰:「唔會特別去減,但有跑步,唱歌嗰時會穩陣啲!」她預告在紀念騷上,肥姐生前的絕密片段將會曝光:「會播一啲難再睇到,或者冇睇過嘅片段。」為免屆時勾起喪母之痛,她表示有強迫自己狂睇片「減傷」:「一個月前已經睇媽咪啲片,因為驚到時睇會喊。(屋企睇有喊爆?)OK嘅,所以我對眼長期都腫。」

將於月底度過26歲生日的欣宜因要準備開騷,所以會將慶生活動押後,她說:「我生日同開騷差兩日咋!唔緊要啦,後生女呢啲可以後補慶祝。」她又向在場的唱片公司老闆何哲圖暗示:「可能老闆想畀驚喜我呢!」