朱慧敏諗定40歲切乳房
有遺傳乳癌基因的前港姐朱慧敏，大讚安祖蓮娜祖莉為防癌而切除乳房相當堅強，她20歲時曾考慮做此手術，但醫生指她未結婚及生育，故不贊成。她不諱言若40歲仍未生仔亦會效法：「我情願保住條命。」
雖然遺傳乳癌基因，但朱慧敏仍樂觀面對，更諗定40歲或以後做切除乳房手術！
安祖蓮娜為預防乳癌而接受乳房切除手術，消息一出即轟動全球！（資料圖片）
汪阿姐認為患癌很需要另一半支持，而阿蘇憶述患病仍從容不迫。
汪明荃
荷里活女星安祖蓮娜祖莉（Angelina Jolie）公開表示由於有乳癌基因而切除乳房，獲不少人大讚堅強，2004港姐亞軍朱慧敏原來亦有這種基因問題，其外婆、母親及阿姨亦因乳癌病逝，母親及阿姨去世時只是48歲。
朱慧敏昨日接受電話訪問時說：「如果我打破唔到48歲關口，依家我32歲，咁咪得番16年命玩？所以我要開心啲，開心啲個人都長命啲。」她又坦言不會畏懼：「我唔會完全唔擔心，但我相信命運，我生出嚟就有呢個基因，只可以積極面對，冇得逃避。我依家會注意飲食，少食有激素嘅嘢，例如避孕丸、燕窩、雪蛤膏同雞等，多食蔬果，而且我睇開嗰個醫生係乳癌專科醫生，同埋都會半年做一次檢查。」
真愛唔會介意
朱慧敏坦言20歲時已知美國有切除乳房防癌的手術，亦有跟做醫生的親戚傾談，故對安祖蓮娜的舉動並不震驚。她表示約10年前曾考慮做手術，但醫生不贊成，因為她還未結婚及生育。問到現時可會再考慮？她說：「我諗40歲之後啦！如果未有小朋友，到時睇吓身體狀況同問吓醫生，可能到時有藥食唔使割呢！不過做唔係壞事，問我切除乳房定要條命，我情願保住條命。」提到女性切除乳房，另一半或會介意，她坦言有與另一半談及：「如果對方介意，就唔係真愛啦！」
抗癌勇士蘇施黃、汪明荃和林淑敏對於安祖蓮娜為防患癌而切除乳房均大讚勇敢，阿蘇說：「作為藝人，肯講已經勇敢，加上佢靠樣同身材演出，講出嚟承受極大輿論壓力。雖然佢未有癌就做手術，但我可以接受，萬一將來發現患癌就一發不可收拾。」阿蘇憶述2005年發現胸部有一粒小於1cm的腫瘤，為免惡化而接受腫瘤切除手術，保住胸部，她說：「其實癌病對我嚟講唔大件事，類風濕關節炎先令我困擾，最嚴重試過上車要四個人扶，急尿但隻手痛到冇力拉褲鏈。」
林淑敏感同身受
同樣曾患乳癌的林淑敏說：「我明白佢嘅諗法，如果之後先發現有事就麻煩，可能安祖蓮娜去第三世界國家探訪多，見嘅嘢同我哋唔同，覺得生命比外表重要。」至於汪阿姐則認為安祖蓮娜為了家人做手術相當偉大，同時認為有另一半的支持是很重要。問到當年患癌可有另一半支持？她說：「過咗咁耐，已經唔記得喇！當然我都有屋企人支持啦！」
