嘉玲膽粗粗康城「獻唱」

劉嘉玲憑與內地藝人陳坤合演、新進導演劉韻文執導的電影《過界》殺入今天開幕的《第66屆康城電影節》，成為十八部入選「一種關注」單元的參賽電影之一，嘉玲更問鼎「最佳女演員」獎項。除憑演技闖康城外，嘉玲今次更會唱入康城，因久未唱歌的她特別為電影唱主題曲《終點的起點》，令大家得以再聞她的金腔。

曾於1994、1995及1996年分別推出《真情流露》、《相信愛情》及《情冷卻》三張唱片的嘉玲，自言已經有十多年沒有再唱歌，她大爆原來是因一時口快才答應唱主題曲：「嗰日同監製施南生、男主角陳坤等人食飯，有人提議不如由我唱主題曲啦！當時我口快快答：『好呀！』結果到第二日瞓醒先識驚！」

唔敢問王菲

她坦承感到壓力，承諾開腔後每天瞓醒都是諗起首歌，亦曾想過放棄，因怕唱不出感覺令人失望，但在導演及各人支持下，最終亦走進錄音室：「因為我熟悉個角色，可以唱出主角嘅心情同性格，可以有更切合嘅效果，先膽粗粗唱落去！」她表示主題曲將於片尾播放，會給予觀眾有人生新開始的感覺。

問到老公梁朝偉有否聽過此曲時，嘉玲即搞笑地說：「唔敢畀人知！佢唔知，都唔諗住同人講。諗住到時喺康城電影播出片尾時，有人睇到就睇，睇唔到就算！」雖然她的好友王菲及那英等均是唱得之人，但嘉玲亦只想保持低調，未敢請教：「講都冇講！唔敢開口，最好冇人知！」

整首歌由決定到錄音過程只有一星期，完成後她自言加強了自信：「依家個人成熟咗，無論唱歌定拍戲，只要用真誠演繹內心感覺，人哋係會感受到。」而嘉玲亦表示此歌有一定難度，因節奏較慢及哀怨，要反覆練習才能上口。

象徵式片酬

對於有否信心在康城獲獎時，嘉玲強調接拍前未有想過獲提名，只想拍一套好電影：「一開始接拍時冇收片酬，只係想幫啲新進導演達成夢想，但導演好有誠意，成個拍攝過程好似神奇故事咁，愈來愈多人投入，最後有新資金投入，先收番少少象徵式片酬。」她又說：「後生時好想人畀機會，到依家如果有力能、可以嘅話，都希望畀多啲機會人。」

剛從台灣返港的嘉玲，將在康城時間本月18日在當地踏紅地氈，她透露偉仔將會同行，她甜蜜的說：「當係對我一種支持啦！」