葉翠翠龔嘉欣屢敗屢愛

現年31歲的前港姐冠軍葉翠翠，身材高挑，常被誤以為她性格硬朗、醒目，但實際上她只是小女人一名。提起失戀，翠翠沮喪地說：「我到依家都搵唔到治療失戀嘅方法。」失戀初期，她更會有嚴重的負面情緒：「我會收埋自己，冇心機做所有嘢，朋友約我都唔去，心痛到抖唔到氣都試過！」她又透露曾有段感情，幾年來一直影響她的情緒，但自己亦察覺不到，直到朋友提醒才驚覺前男友對她的影響如此深：「會冇心機持續三幾個月，但人大咗，分手失去嘅唔只係冇咗個男朋友，而係整個生活都受影響。唔會日日愁眉苦面咁誇張，但可以喺嗰個負面情緒中生活幾年，一直行唔出個陰影。」

在愛情面前，再聰明的女人都會變得愚蠢，翠翠也自覺對愛情盲目：「次次都要傷心到體無完膚、遍體鱗傷，個底線低到冇得再低，先肯放手，唔知點解會咁，感情真係非常難控制！」

主動出擊搵真愛

翠翠小時候任性，話走就走，話分就分，無形中傷害了不少人，她說：「我唔會當面講分手，會一夜失咗蹤，唔聽電話、唔覆短訊，嗰時認為都決定分手，就冇必要去講。依家諗番都覺得對唔住初戀男朋友，唔明點解當時可以咁決絕。」然而，當翠翠嘗試在發現問題時盡力解決，而非立即斬攬時，反而令自己傷心：「試過錯失好好嘅人，所以開始希望每段感情都盡力去挽留，唔輕易放手。當對方對我做咗啲負面嘅嘢，氹吓我、求吓我，我就會心軟接受番佢，但冇耐佢就會故態復萌，唔開心嗰個變咗係我。決絕啲自己會開心，但人哋就會受到傷害！」

堪輿學家蘇民峰曾批翠翠會於2016年覓得真命天子，問她會否真的靜待至2016年？她坦白地表示相信蘇師傅的說話，但不會守株待兔：「蘇師傅講我呢幾年嘅感情係中晒嘅，我都信可能真係2016先搵到Mr.Right，但我唔會等，會繼續搵，因為我係一個鍾意愛嘅女仔。」

現年23歲的Katy，個子嬌滴滴，給人感覺是「受保護動物」，但原來她外表柔弱，內裏堅強，處理感情問題亦非常正面：「失戀之後一啲以前拍拖去過嘅地方，我會再去，愈去就代表愈冇事，咁樣仲好！」不過，Katy深明「講就容易做就難」的道理，她說：「好多道理係知道嘅，明白失戀只係人生一件好小好小嘅事，但都總會唔開心一段時間，諗起就會喊，係要喊嘅，因為喊先會抒發到個情緒，絕對唔可以匿埋，一定要見人，但係我唔會喺朋友面前喊，所以佢哋唔會知我唔開心嘅程度去到邊。短期可以做到嘅係令自己分心，長期都要用時間沖淡一切！」

圈外圈內難取捨

Katy去年與前男友鄧健泓分手時，不斷傳出各自有第三者，弄得滿城風雨，令她害怕再與圈中人拍拖：「伴侶係圈內人嘅話，永遠都牽連好多人，分開時一定會話有第三者，因為大家都係藝人，有機會畀人編故事。（揀圈外人？）圈外人引伸嘅新聞唔會咁複雜囉！」雖然如此，Katy明白要圈外人去了解藝人的工作也是一件極其困難的事：「同藝人一齊，要體諒我哋嘅工作，我哋做嘢已經大壓力，如果仲畀壓力我嘅，就唔係愛我，愛我應該會叫我唔使擔心，放膽畀我去做、畀信心我。」

人細鬼大的Katy坦言要從失敗中學習，希望擺脫「速戰速決」的性格：「以前一撻就着，都未了解清楚就一齊，依家有經驗會好啲。對一啲有好感嘅男仔，我想做朋友先，咁可以同男朋友講定，將來都要好似朋友咁相處，咩嘢都講，唔可以瞞！咁樣係最舒服、最理想嘅相處方式。」勇敢面對感情問題的Katy，更笑言有時女孩子不妨主動一點：「做朋友做咗一段時間，女仔可以試吓畀啲暗示男仔，因為捉個時間好緊要，時間啱就有機會開始，唔啱就會一路做朋友落去。」

有些女孩子人前人後兩個樣，即使拍拖，甚至結婚仍努力掩飾自己缺點，Katy亦認為在摸索階段要盡量「表現良好」：「點都會掩飾吓，可能唔好咁粗魯，咁係正常！要到認識對方多啲、時間長啲，慢慢會發現對方最真嘅一面，唔需要刻意！」

後記：仍信童話愛情

愛情，果然是一個永恒的話題，在訪問中，翠翠滔滔不絕，大談對愛情的看法及經歷，反而Katy充當聆聽者的角色，更會給予翠翠意見。當以為「少女心事，飄忽的戀愛不見終點」時，Katy告訴我們，在愛情上，年紀只是數字。翠翠與Katy都受過情傷，但當記者問到她們是否仍相信愛情時，翠翠可愛地展示電話的桌面笑說：「我仲係用童話故事嚟做電話桌面，希望搵到好人啦！冇係正常，但都希望有嘅！」Katy則說：「唔會灰心，會出現就會出現o架啦！」

好友助療情傷

失戀時，身邊好友通常會立即蒲頭，發揮三陪作用：陪喊、陪玩、陪散心，令人知道「冇咗男朋友，仲有一班好朋友」。翠翠表示一有感情問題，朋友便會出現她身邊，並大讚好友高鈞賢：「我次次打畀佢都問同一個問題，佢每次都有耐性咁答我，又冇嫌我煩，真係唔話得！」

而Katy亦點名讚好友許家傑和楊明：「有時我鍾意同男仔傾偈，有啲嘢女仔唔明，係男性朋友先可以講到男仔嘅睇法畀我聽。」她又不忘感謝一眾姊妹：「佢哋會馬拉松式咁陪住我，就算我唔出街都會上我屋企，安排好多節目畀我，又介紹男仔我識。」