質爆
祥仔呢招泰「Pat」壓頂，擠到敏之面容扭曲呀該煨！

陳敏之在新劇中為博觀眾一笑，不惜犧牲粉臉讓祥仔巨躉「親近」，笑言大感害怕，惟祥仔一臉沾沾自喜，坦言男人下盤要打得穩，更着敏之大可放心，他絕不會中途放屁！

質爆
祥仔呢招泰「Pat」壓頂，擠到敏之面容扭曲呀該煨！

呼救
敏之慘遭「祥躉」不斷攻擊，幾乎反眼！

輾胸
祥仔趷籮死撞爛撞，敏之塊面避得開，個身就走唔甩喇！

工作人員為祥仔嘴邊化上疱疹妝，敏之愈睇愈驚！

難得演喜劇的敏之咁大犧牲，都係為同祥仔擦出火花啫！

陳敏之與阮兆祥攜手於無綫新劇《My盛Lady》放笑彈，昨日拍攝二人於小巴相遇，混亂間祥仔的巨躉不慎撞向敏之粉臉，由於敏之誤以為他患性病，嚇得o依嘩鬼叫。為了Pat撞面的位置準確，二人於拍攝前曾多次試位，敏之還不時拉住祥仔的長褲左度右度，祥仔又把臀部翹起，畫面相當「香艷」！

一身「小雲」Look打扮的敏之，笑指以往演慣靚女角色，今次終可一嘗喜劇演員的滋味，日前還特意翻看祥仔及許紹雄扮同志的戲份，令她笑破肚皮。劇中她被黃子華改造成歌手，敏之表示要與神級演員合作感榮幸，為免連累他人NG，事前已做足功課準備，她說：「期待同佢開工，本身勁鍾意睇佢作品，想喺佢身上學到喜劇知識！（畀祥仔臀部撞落塊面度有咩感覺？）佢Pat Pat咁大都驚，不過OK啦！頂得住。」談到昔日好友陳山聰甩拖，敏之淡然表示雙方沒有聯絡，更不欲多作評論。

下盤夠穩冇漏屁

而祥仔就透露街坊非常期待他與子華這個組合拍劇，對於被取笑臀部大，祥仔笑說：「唔大咪坐唔中敏之塊面，佢塊面咁細，男人『肌』礎打得穩，下盤都要穩！其實我都唔係好勁，唔係龍躉！（唔驚拍拍吓放屁尷尬？）唔會，唔會做啲太核突嘅嘢，呢場戲純粹搞笑啫！」