Kelly收蝦餃仔禮物母得頂

媽咪呢份工唔易做，又絕不能輕易「辭職」。兩位樂壇天后陳慧琳及楊千嬅，要兼顧事業及家庭，雖然湊仔辛苦，卻享受做媽媽的過程！育有蝦餃仔（劉昇）及小龍包（劉琛）的Kelly，昨日在個人網誌上載多張囝囝的相片，Kelly表示首次收到蝦餃仔親手做的母親節禮物。雖然沒有上載禮物照，但字裏行間都能感受Kelly的母愛，她留言：「第一次收到劉昇親手做的禮物，好感動！」其後她接受電話訪問時表示，今日會一家四口過母親節。

買玩具打孖上

Kelly又表示不會偏心：「做咗媽咪先感受到真係會長期擔心個仔，真係好偉大！我平時買玩具都會打孖上，唔會偏心。」更以「全世界最重的小龍包，皮薄餡靚」稱呼小龍包，又自爆：「佢太重喇！真係唔可以抱太耐，不過佢依家個人拉高咗，塊面已經冇之前咁肥嘟嘟！」另外在網誌中見到她與小龍包一起看書，她說：「蝦餃仔似我，鍾意留喺屋企唔出街，不過幽默感似足Daddy！而小龍包就好鍾意出街，雖然好貪玩，但比起阿哥佢就鍾意睇書！」問到會否追女？她說：「唔諗啦！呢一刻真係唔會再諗啦！」

而首次以母親身份過母親節的千嬅，昨日在微博上載與囝囝丁進諾（Torres）的合照，千嬅更抱高Torres，Torres恍如西班牙國腳費托上身，將千嬅鼻子當波咁踢，千嬅代Torres發言證明自己「無添加」：「Torres：媽咪，我肯定你漂亮的鼻子是真的！」

上載細女照片

其後千嬅接受訪問時表示，今日會四代同堂慶祝，她會親自下廚，希望家人感受到自己的心意：「我覺得Homemade有意思過送嘢！第時我個仔大個，都會想佢煮飯畀我食。」她又謂當媽媽後，生活有很大改變：「工作方面會安排得好啲，會盡量抽時間陪個仔。平時行街買嘢都會買畀個仔先。」雖然Torres差不多一歲，正在經歷「講火星話」階段，千嬅坦言恍如患上「妄想症」：「每次佢一發音，都好似意識到佢叫媽媽爸爸，雖然根本係呃人，但都會好開心。」

此外，已有一女的藝人林嘉欣昨晚約十時在微博公開喜訊，上載了初生二女Sofie Yuen的照片，並留言：「祝所有癡媽，母親節快樂！我們家的新成員Sofie Yuen。」2010年林嘉欣與導演袁劍偉奉子成婚，同年誕下大女Kayla。

曹敏莉

已有一女的前港姐曹敏莉（Mandy）昨日接受電話訪問時承認再懷胎四月，胎兒是男性，Mandy更已為未出世的兒子改了英文名Marco。

楊思琦

楊思琦忙舞台劇未能與囡囡慶祝母親節，但她表示要答謝媽媽：「多得媽媽照顧我同囡囡，禮物太物質，媽媽其實想我多啲時間陪佢，呢個先係最珍貴禮物。」

Lisa S.

將快分娩的名模Lisa S.日前舉行「Baby Shower」，邀請一班好友出席，身穿Deep V紅裙的Lisa拿起尿片並伸脷扮舔尿片。

黎燕珊

黎燕珊苦笑收到一份非常心痛的母親節禮物：「個女實習時唔小心整親手，傷口要縫針，擔心到我想立即飛去台灣睇佢。」珊姐表示子女很愛錫她。

蔡少芬

蔡少芬（Ada）長女楚兒昨天生日，今天是母親節，Ada因要忙於照顧細女信兒，而未能與楚兒慶祝，她笑說：「佢咁細個都唔知咩係生日Party，等我冇咁忙時補番都一樣！」

司馬燕

因胃癌割除胃部的司馬燕，昨日收到兒子吳澋滔及吳景燿親手製的感恩卡，令她很感動，並在微博中留言，這是最寶貝、最無價的母親節禮物。