鵬哥（右）與詹Sir以浮誇造型出席記者會，十分搞笑。

兩位扮嘢界大師盧海鵬（鵬哥）及詹瑞文（詹Sir）將於下月於紅館開騷鬥扮嘢，兩人昨日以浮誇造型出席記者會，先來一場扮嘢「前哨戰」，詹Sir即場表演自創新歌《好重口味》，與性感舞蹈員勁舞，更爆粗兼勁唱「笑你老味」，笑爆全場！

鵬哥（右）與詹Sir以浮誇造型出席記者會，十分搞笑。

鵬哥和詹Sir將於下月14及15日於紅館展開一連兩場《詹瑞文盧海鵬紅館奇幻扮嘢大典》，昨日他們以一身浮誇Look出席記者會，全身一紅一白，上身戴冷帽，下身打拳褲前配以一抽啷啷，認真爆笑！兩人更互送高帽，詹Sir向鵬哥送出寫上「一代扮嘢宗師」的牌匾，鵬哥則以一個大英文「C」字回禮，寓意一代大「師」。詹Sir又即場自創新歌《好重口味》，和鵬哥與4位性感女郎勁舞，詹Sir勁嗌「試咪」，並踩界勁唱粗口諧音「笑你老味」，十分搞笑。詹Sir又透露開騷當晚會解構鵬哥當年試咪的淵源，又會扮演多位藝人如徐小鳳、盧冠廷及達明一派等，更希望邀請他們擔任評判。

問到開會度橋時可曾試過意見不合？鵬哥說：「冇，我哋唔想齋Talk或齋扮，今次又Talk又扮，歌舞連場。（會唔會加場？）有信心反應好會加場。」提到解構鵬哥試咪的環節，詹Sir笑說：「嗰晚其中一部分係要家長指引，如果唔啱聽嘅可以去廁所。」他又預告當晚將會化身舞台王者郭富城，而鵬哥則會扮Michael Jackson，在台上舞鬥一番。問到鵬哥可會操肌扮城城？他說：「本身我都有肌肉，唔好睇小我！」詹Sir則笑說：「呢Part交畀我啦！」

牛一度橋避談女友

另外，今天是詹Sir 48歲牛一，問到他會如何慶祝？他說：「都係要度橋，工作中度過囉！」當問到他會否與緋聞女友Amenda慶祝時，詹Sir即搭住鵬哥膊頭，笑言與男朋友慶祝，借鵬哥做擋箭牌。問到詹Sir可會怕鵬哥「爆大鑊」？他說：「唔驚，我哋有晒稿，佢爆嘢會事先講聲。」