洪子崎下廚母煮見

洪子崎（Angelina）的母親是時裝設計師，但同時相當「煮得」，加上婆婆亦是烹飪高手，Angelina自小受薰陶下亦學會不少拿手菜。近年她有感家人年事已高，怕廚藝失傳，於是啟發了寫Blog的念頭，她坦言即使將來母親百年歸老，她亦能以此懷念摯親：「我希望盡力記低媽咪嘅食譜，我個Blog有中、西式同甜品嘅食譜，所有中菜都係媽咪教我嘅。」

此外，Angelina有感年輕一代已不會在家做飯，她希望讓年輕人享受烹飪的樂趣：「唔少人會話廚房細或者煮嘢食難，我喺Blog上載咗我廚房嘅相，仲寫明廚房嘅面積，我想畀大家知道，就算廚房細一樣煮到餸，我仲會逐個步驟影埋相放上網，只要大家一步步跟住做，根本唔難！其實烹飪過程非常開心，而且自己煮嘢食比出面食健康得多。」

Angelina的美食Blog開始了一年，由文字、版面設計到拍照都由她一手包辦，得到不少捧場客，還獲著名廚具品牌及圍裙商贊助，她有意增加內容：「我諗住推出Food And Beauty（美食與美容），例如用食物自製面膜，仲會介紹本地小店同食肆。」原來最近洪媽媽亦開始把私房食譜放上網，Angelina最大的心願是母女檔推出烹飪書。

食出屋企滋味

今次Angelina示範製作臘味蘿蔔糕，材料豐富，啖啖蘿蔔絲，非常有「家」的感覺。她表示煮的過程並不困難，但將材料切粒及刨蘿蔔要有耐性，她還有幾個貼士：「記得刨蘿蔔時要留蘿蔔水備用，炒香臘肉等材料唔使落油，因為臘肉會自然出油。炒好之後唔使洗鑊，直接用嚟煮蘿蔔絲，蘿蔔同臘肉嘅比例可以根據個人喜好而加多減少。」

心細如塵

Angelina有四分一英國血統，自小移民澳洲的她是「鬼妹仔」一名，不過她說得一口流利廣東話，而且煮中菜非常熟手，可見下廚經驗豐富，絕非一般「竹升妹」。示範當日，她親自預備所有材料，由調味料、生油至蘿蔔水等都一應俱全，並放在預先準備好的密實盒內，她更細心地準備了錫紙盒給記者將蘿蔔糕帶回公司享用，非常貼心，大家在現場試味後一致激讚，要畀十個「Like」！

臘味蘿蔔糕材料：

白蘿蔔2個（去皮，刨粗條）、生粉1杯（8安士量杯）、粘米粉1杯、蘿蔔水或清水1 1/2 杯、臘腸3條，臘肉1條、蝦米1/2杯、乾冬菇4至6隻、雞粉1湯匙、糖1 1/2 湯匙、胡椒粉1湯匙、油3湯匙、鹽1茶匙。