古天樂「收工」即結婚

現年42歲的古天樂最近與陳喬恩及陳妍希兩位台灣女神傳緋聞，前晚他出席活動時自爆同齡的中學同學已為人父，令他亦恨成家做老竇，並聲稱不用等十年八載，拍完手上的戲便會物色女友結婚生仔。

古天樂（古仔）、汪圓圓及車婉婉等前晚出席名酒派對，西裝骨骨的古仔電暈在場不少女士，大批師奶粉絲化身龍友狂拍照，古仔表示大會邀請了幾個與他相識30載的中學同學到場：「我同佢哋都有半年冇見，今晚見到好開心，有幾個同學仲帶埋自己嘅小朋友。（得你未結婚？）仲有兩個都未結，我唔係最後一個。（屋企人冇催婚？）我阿爸都係40歲先生我啦﹗」

減少工作專心湊B

現年42歲的古仔被傳媒催早日拍拖及成家，他亦承諾一定會組織家庭，並表示有了小朋友後便會減少工作，實行做個負責任的爸爸。問到是否要等十年八載才肯成家立室？他信心十足地說：「10年8年我都50幾歲，應該唔使搞咁耐。」不過他又說：「但要等我有時間先，今年好忙，會拍6至7套戲，等拍完先物色女友，出年就拍完o架喇！」古仔工作多多，但在福布斯中國名人榜的收入排行卻榜上無名，他說：「因為上年只拍咗兩部戲，所以冇，下年應該會有。」

另外，年底便成為新娘子的汪圓圓，提到姐夫甄子丹登上福布斯中國名人榜收入排行榜之首，她為對方感到高興，但有點驚訝：「（收入）誇大咗，係家姐講o架！」見圓圓比之前消瘦及省鏡，她卻表示沒有刻意減肥，可能是壓力及忙碌所致：「我工作忙，籌備婚禮又忙，好在家姐有幫我手，我會均衡飲食同食得健康啲。（幾時停工？）暫時未，婚後就唔知。（幾時生BB？）結婚先。（婚後即生？）唔到我揀。」