富二代瘋狂派對開屏

o靚模「爆E超蓮」鍾采羲（Iris）昨日凌晨參加富二代派對慘遭輕薄，有人借醉行兇伸手揭其裙底，令她當眾露出紅色內褲！Iris事後受訪，扯火表示知道對方身份，直斥有人不尊重女性，但不欲追究。

城中富二代昨日凌晨於蘭桂坊開P，廣邀藝人及o靚模「戥場」，林愛兒、歌手林德信、「爆E超蓮」Iris、邵美琪男友施祖男、何傲兒富二代緋聞男友等紛紛現身，場面熱鬧兼愈夜愈瘋狂。

一身性感低胸白裙打扮的Iris與多名女友人於場內玩自拍，火速成為場內男士焦點，着深色衫的富二代幾杯落肚後走近要求影相及攞電話號碼，他先靠近一名着低胸裝的女子身邊吹水，再順勢與身旁的Iris打開話匣子，除了愈挨愈近，又撩Iris鬥酒，Iris起初亦有防範及以手掩胸，但見盛情難卻，即玩埋一份，不料舉杯暢飲時，有人明目張膽伸手揭起Iris的短裙至其腹部，令她當眾露出紅色內褲大出洋相。Iris來不及反應呆在當場及O嘴，幾秒後才「回魂」以手按實裙襬兼一度黑面，並舉起手作狀想掌摑對方，氣氛尷尬，但為免掃其他朋友興，她亦強顏帶笑閃開算數。

Iris扯火斥唔尊重

事後記者聯絡Iris，她怒氣未消：「遇到咁嘅情形梗係驚啦！我都嚟唔切反應，但冇畀佢掂到，如果唔係會一巴打埋去！我知佢飲醉，但行為唔啱，對女仔唔尊重！（現場有人話佢係何傲兒緋聞男友？）係，總之係朋友嘅朋友，所以算囉！」

而該富二代當晚撩完Iris後，火速轉目標，一個身位「得」在林愛兒旁邊，伸手搭着她的膊頭密密斟，最後索性整個頭貼近林愛兒耳邊，此舉即令她不悅，黑面彈起身，並手指指對方，該富二代一度出手捉實林愛兒手臂，但她不予理睬。

同場撇下緋聞女友松岡李那的「夜場常客」林德信（Alex），繼續大受女性歡迎，他與一名長髮女言談甚歡之際，該富二代竟走近「挑機」，林德信甚冇癮。至於施祖男則未有「餓男」上身，只顧做「低頭族」不停篤手機，似向女友傳情話。

Alex昨日透過經理人公司同事回應說：「Alex嗰晚做完活動，同朋友去另一位朋友嘅生日會。（長髮女係邊個？）唔係女朋友，佢都冇拍拖。」又表示Alex只逗留片刻，故沒有目擊「揭裙」事件。此外，Alex亦否認與資深藝人秦沛的女兒姜麗文拍拖，指雙方只是好友。