陳嘉桓「戰地」開工喊驚

藝人陳嘉桓（Rose）與有線主播衞志豪昨日身處南韓拍攝旅遊節目，遇正南北韓局勢緊張兼隨時開戰，Rose只好手機不離手，頻頻向家人報平安。

正於南韓拍攝有線旅遊節目《快樂地球》的Rose，受訪時坦言擔心南北韓開戰及安全受威脅：「雖然我哋今日出去拍嘢，市面尚算平靜，旺區仲有好多香港遊客，但聽到話可能開戰，我都好擔心，連當地導遊都話今次情況唔樂觀，我哋喺南韓要留到18號至返香港，聽日仲要去釜山拍攝，有線暫時冇打算撤離。我都驚屋企人擔心我，所以一去到有WiFi嘅地方就WhatsApp報平安。其實我此行都好黑仔，連行李篋都爆埋，要買過個新！」

有線方面則表示：「已經密切注意南韓局勢，會以同事安全做大前提，但暫時未有情況，拍攝會繼續。（打仗保險唔賠？）了解緊啲細節，我哋嗰份應該保埋。」

錢國偉南韓返港

此外，上月底亦在南韓拍旅遊特輯的錢國偉說：「我忙緊剪片，六月喺RoadShow播。（有指短期內香港人都唔敢去南韓？）就算真係打仗都唔會拖到咁耐，應該唔會影響到我哋嘅播出日期。」