阿澤突擊金像影帝

杜汶澤形容開拍《低俗喜劇》，換來的快樂與肯定，非筆墨所能形容，更能與偶像梁朝偉，角逐金像獎「最佳男主角」，令他覺得榮幸，但談到郭富城未能入圍，他說：「如果佢入圍，我一定輸硬啦！」

阿澤與導演彭浩翔以850萬港元資金，及不足兩星期拍成《低》片，結果相當成功，而促成拍這部片全因與內地網民的一場舌戰而起：「佢哋喺微博鬧我哋，連普通話都未講好，學乜人返內地影圈搵食？跟住我哋咪覺得應該拍番部純正嘅港產片囉！」阿澤表示今次肯定做對了，在去年的金馬獎，以及即將舉行的金像獎，他都能憑《低》片角逐影帝。金像獎對手都是影帝級人物，包括梁朝偉（《聽風者》）、梁家輝（《寒戰》）、張家輝（《大追捕》）及劉青雲（《消失的子彈》），阿澤無疑是「越級挑戰」，唯一令他感遺憾的，是郭富城「落選」。

談到城城，他說：「個個覺得今次梁家輝贏梗，但對城城好唔公平，真心覺得佢做得好，成件事好奇怪囉！如果佢入到圍，我一定輸硬，依家反而未必，你話我話嘅﹗一個咁好嘅演員，竟然冇攞過金像影帝應該因為太靚仔啩，咪等於當年張國榮演《春光乍洩》出神入化，金馬都輸咗畀《南海十三郎》。」

攞獎唔重要

談起偶像梁朝偉，阿澤繼續化身影評人，他說﹕「偉仔無疑係戲精，不過《聽》片唔係佢嘅代表作囉，如果今年佢憑《一代宗師》入圍，我諗我連當晚去會場嘅車錢都可以慳番，不如煲煲湯水坐喺屋企睇電視支持好過啦，根本冇得鬥。無論如何，我今次能夠同偶像齊齊入圍，真係好榮幸。」

對於得失，他自言年紀愈大，消化力愈強，去年在金馬獎落敗，他從宜蘭坐車回台北後，已完全釋懷：「我係一個喜劇演員，問心講攞唔攞獎唔算太重要，最緊要係票房好，搵食呀！」一套《低》片收3,000萬港元票房，當事人名利雙收，豈止搵食咁簡單﹗