紅星拱照 志偉爆喊

曾志偉本周日60歲生日，昨晚無綫豪花400萬為他開生日派對，紅星好友紛紛出席，包括周杰倫、譚詠麟、黎明、李克勤、劉嘉玲和陳慧琳等，中港台紅星拱照！當阿倫與克勤合唱時，志偉更一度感觸落淚。

本月14日是曾志偉的60歲生日，昨晚無綫為他在灣仔會展舉行《志在高興 志偉大派對》，筵開60席宴逾700位親友。無綫送大禮，費用全包，除每席鵝肝牛柳西餐宴達1萬元外，連全晚製作費共花費400萬元，節目將於志偉生日當天播出！出席賓客除無綫老闆陳國強、高層李寶安和樂易玲等外，譚詠麟（阿倫）、黎明、劉嘉玲、陳慧琳（Kelly）及吳君如等有出席，台灣天王周杰倫亦親來道賀！志偉所收人情將全數撥捐三間慈善機構。

搞「綠寶」教健身

全晚高潮莫過於阿倫與李克勤合唱時，志偉感觸落淚！在王祖藍等人表演時，志偉技癢上台展舞技。志偉自言不會飲醉：「因為有After Party！（生日願望？）想搞個『綠寶』，畀啲55至60歲嘅藝人創新天地！佢哋都係精英，可以貢獻社會，計劃搞健身室，教人健身。今年已減少工作，歎世界！啱啱同阿倫去完玩，之後同家人去旅行，第二場就同學友去，玩嘅都排到12月！」

劉嘉玲笑言人到已經是最好的禮物：「之前同志偉慶祝咗好多次，佢好似羅漢咁，我每次唔順時，佢都幫到我順晒！（你60歲時會大搞？）我希望可以長命到60歲，都想大搞。（你有咩唔順，佢幫到你順？）我好想學到好似志偉咁，醉咗可以打橫咁抬出嚟，但我唔可以，志偉佢幫過我好多。（合作拍戲？）之前有傾過但唔啱拍，未有合作過。」

Kelly則穿珠片Tube Dress，並稱捐現金當做慈善，與志偉一切在心中：「今晚會唱番第一次同志偉合作電影時嘅主題曲。」問到其囝囝時，她坦言因H7N9禽流感而更注重衞生：「囝囝一返屋企就要即時洗手同換衫，唔係會拒絕佢掂細佬。」阿倫則笑言已與志偉慶祝了無數次，並稱送上六位數股票給志偉作禮物，祝他愈賺愈多！問到志偉的「綠寶」計劃，他說：「健身器材上網買就係，使咩我教。」英皇集團主席楊受成則一早到場，與志偉在紅地氈上搭住膊頭有傾有講。楊生透露有意找志偉拍喜劇，他因要出席另一活動才先行離開，但會再回來。

外孫女表演助興

另外，志偉女兒曾寶儀由台灣請假回港，但笑言成了父親的小助理，其弟曾國祥亦有出席，並上載場內照片。昨晚在表演台上放置表演用樂器及一個近四米高的巨型Q版志偉公仔。開場時，志偉再次感謝出席賓客：「之後唔想搞怕勞民傷財，但近排又想搞，好多謝TVB！過去嘅嘢唔好再講，活在當下，最緊要大家開開心心！」居於加拿大的外孫女Evita突然現身表演跳舞，令志偉感驚喜。

眾好友表演賀壽，林子祥以神秘嘉賓演唱，他自爆與志偉等當年生日時，愛互掟蛋糕。場內見周杰倫及胡軍寂寞地獨自坐在席上，但Kelly大受歡迎，不少賓客爭相合照；癌病康復中的張達明不時獲好友慰問他。