謝安琪貴價補品抗疫 訓練囝囝勤洗手

謝安琪（Kay）出席活動時表示極度關注H7N9禽流感疫情，並透露一家三口早已做足防禦措施，不但食蟲草及靈芝等健康補品打底，更叫寶貝仔張瞻切勿用手擦拭眼鼻，以及勤洗手防「中招」。

謝安琪（Kay）、羅力威、陳柏宇及林德信等人前晚出席《饑饉三十2013》，最近內地不斷有H7N9禽流感的確診個案，問到Kay有否留意？她說：「有，好驚！成家人之前已經喺一、兩個月前食定靈芝、蟲草打底。（有冇叫囝囝洗多啲手？）有，小朋友冇呢個認識，成日用手捽眼捽鼻，之前都有訓練佢要洗手，仲特登買有香味嘅洗手液畀佢。」

同場的羅力威透露，日前飛往北京探望經理人霍汶希，問到當地疫情及衞生情況？他說：「冇乜嘢，未睇到疫情有幾嚴重，我哋仲去咗食麻辣。」他表示擔心疫情，但幸而不是經常往返內地：「反而同事就成日返，希望佢哋唔好有事，都怕傳染到！」

黃婉曼被爆婚訊

另外，黃婉曼昨日出席活動時被nowTV主持踢爆將於月底結婚，問到是否屬實？她不置可否的說：「到時咪知真唔真囉！」她透露早前曾到內地潮州拜山，問到當地疫情如何？她說：「防疫意識好薄弱。」她透露有在當地喝雞湯：「因為係親戚養，同埋煮到好熟，應該問題不大。」