添哥點名 陳山聰至啱丑角

陳山聰與賭王千金何超雲盛傳結束兩年情，被指四出撈，曾與他合作的「金牌監製」李添勝昨日大方表示不排除再邀他合作，但卻忍不住笑指情聖角色不適合他，反而騎呢角色絕對冇問題！

陳山聰與賭王千金何超雲相戀兩年，近日傳已分手，超雲更飛到倫敦會合妹妹超蓮散心。昨午五時許，超雲於Instagram上載粟米片早餐相，心情似不俗，而甩拖的山聰被指積極斟洽工作，並搬回舊居麗晶花園，但昨日傳媒守候整天仍未見蹤影。

年前與山聰合作劇集《天梯》的監製李添勝，昨日率領黎耀祥、敖嘉年、蕭正楠及唐詩詠等宣傳新劇《神探高倫布》時，被問到若山聰重返TVB會否再找他演出，添哥說：「佢返公司實用佢，上次見佢係兩、三個月前喺公司撞到。（話佢失戀所以撈？）關我咩事？不過佢喺《天梯》嘅角色，第二個做唔到佢嘅神韻。（對佢冇咗信任？）唔會，拍套劇時佢發生談戀愛事情，佢都拍晒先走。（擔唔擔心佢形象變差翻唔到身？）冇所謂，係佢私人問題。（如果觀眾唔想睇呢？）搵佢做情聖實死，做騎呢角色一定冇問題，不過未有適合劇本。」

蕭正楠支持「女友」做馬主

而近日憑《仁心解碼II》自信哨牙仔角色彈出的蕭正楠，早前被本報拍得與緋聞女友何傲芝入馬場，他解釋當日有一名共同朋友的馬匹準備出賽，只是馬匹最後經檢查後證實不宜落場，問是否有意公開關係？他笑說：「公開隻馬呀？（繼續係緋聞女友？）係呀！聽聞佢遲啲想養馬，我會支持佢。（金錢上？）精神上！馬匹比賽我會支持。」