沈震軒蔣家旻激跳大銀幕

回望當年，大部分影壇巨星均來自公仔箱，但近年鮮有成功例子，電視男女藝員沈震軒（Sammy）及蔣家旻（Angel）最近先後踩過界奮戰大銀幕，醉心演技的Sammy憑邪氣角色爆出，提名金像獎最佳新演員獎！形象乖巧的Angel首次拍戲即擔正，更大犧牲飾演「高鐘妹」拍大膽床戲！

予人型格感覺的無綫藝員沈震軒默默耕耘數年，起初多演不起眼角色，至前年終憑《潛行狙擊》爆燈一角成功彈出，劇中他暗戀戰友「跛Co」黃宗澤，有情有義令人記憶猶新！

競逐金像獎新人

去年Sammy踩過界在影壇大放異彩，演繹的兩個角色「蘭桂坊USB」（《喜愛夜蒲》）及坤（《古惑仔：江湖新秩序》）均是性格鮮明的邪氣人物，他更自行加添小動作及令造型更爆，獲得不少讚賞，他說：「USB去夜蒲嗰陣染金毛畫晒眼線好似好型，但我就加啲嘢入去，當佢見到夢中情人劉羽琦即刻變到傻瓜咁，畀差人拉嗰陣就勁怕事，加強反差效果，好開心原來觀眾睇到！」

現年23歲的無綫小花蔣家旻入行逾五年，多演乖乖女角色，最令人印象深刻要數《天與地》的「少女佘詩曼」Yan，以及仍在播放 中的《愛．回家》馬子妮，形象乖巧清純，去年她在台慶劇《大太監》中飾演妓女小釵，色誘曹永廉已算突破，但仍只是有限度的性感演出，最近她踩入影壇終作出大解放！

拋身床上激戰

Angel在導演葉念琛新片《第一次不是你》擔正女主角，片中與新人馬志威（Edward）本是青梅竹馬，但因救母而出賣肉體做高鐘妹，令純愛留下遺憾，劇本意識踩界！不惜挑戰床戲及不乏性感鏡頭的她，直言感覺戰戰兢兢，但大讚劇本出色犧牲有價：「我由16歲演到廿幾歲，經歷咗好多嘢令性格有變化，睇劇本已經感動到流眼淚，之前配音又投入番個角色，又再睇到喊！」

Angel曾在劇集《當旺爸爸》中穿比堅尼晒身材，但甚少露骨演出，她直認最大挑戰是拍親熱戲：「喺TVB咁耐都未拍過，對我嚟講好大膽，都露咗好多地方，前後都有，暫時係我性感極限，其實套戲唔係Sell情慾，唔係講蒲講夜生活嗰啲，係劇情需要，加上攝影師拍得好靚。」她笑言與Edward均是床戲新手，當時又並非很熟落，故大為尷尬，只好交由導演「擺布」，幸好Edward甚有風度，拍攝過程順利。問到何以被導演睇中？她笑言對方原來是電視精，一直有留意其演出，而且不停鼓勵她能勝任。

孭飛忐忑難捺

對於葉念琛起用的男女主角均是新面孔，Angel也覺大膽，問到會否感到壓力？她說：「我冇孭住女主角咁嘅心態，只係當一個角色咁做，盡量唔好畀壓力自己，之前影視博覽睇預告片先識緊張！我想快啲睇到完成品，但又想遲啲播，留份期待畀大家，希望話題醞釀耐啲！」眼見沈震軒獲得金像獎最佳新演員提名，Angel亦希望獲認同，但又覺競爭很大，故一切順其自然，只希望繼續在影壇發光發熱。

至於當年吳鎮宇飾演的坤堪稱經典，Sammy幸不辱命，化上深黑眼圈舉止閃縮，創造另一款奸角模式！最終獲得業界認同，憑《喜》片榮獲香港電影金像獎最佳新演員提名，令Sammy非常鼓舞！

Sammy在兩片中均有激情床戰，背負電視藝員之名，他直言接拍初時也被質疑：「好多人問我做咩咁激都拍？其實我係演員，點解因為係TVB人就唔拍得？有時劇情係需要踩界，用意識交代就冇問題，公司都同我講我唔係偶像派，所以更加要演好啲戲！」提到最欣賞的香港影星， 他首推同是TVB出身的大師兄周潤發：「發哥除咗喺香港紅，仲可以靠文戲去荷里活發展，過程實在唔易。」提到發哥初踏影圈時也一度淪為票房毒藥，Sammy明白電視藝員殺入影壇需要「過冷河」讓觀眾適應，自己會不停步繼續努力。

小角色挖空心思

雖然未必每個角色都有發揮空間，但努力不懈的Sammy要求盡善盡美，例如在《法證先鋒Ⅲ》中只演繹普通CID，他卻Gel頭留鬚穿皮褸，予人日本「型」警的感覺！用心原來有人留意，後來監製劉家豪拍攝《護花危情》時，要求飾演保護證人組的演員參考Sammy造型，他得知後大感受寵若驚！