黎明為女蝕讓法拉利

天王黎明年前以500萬元購入法拉利458 Italia超級跑車，落地兩年多卻割愛賣出，據知因戰車馬力太大，引擎聲嚇親鄰居小妹妹，他在鄰居與愛車二選一的情況下，決定棄「車」保「居」，並斥逾400萬元購入一輛較靜的Bentley跑車，以免再搞喊鄰居！

不少紅星都是辣跑發燒友，車庫猶如跑車博物館，除擁有多部限量版超級跑車的郭富城外，黎明亦曾擁有5架辣跑，對法拉利更是情有獨鍾，先後擁有F355、F360及F430的首批跑車，又於2010年豪擲500萬元購入法拉利458 Italia型號黑色超級跑車，並掛上他所愛的「R1VA」自訂車牌出巡！不過，本報發現他早前已將愛車出讓！

據知平日事務繁忙的黎明，多於晚上11時後才能駕駛愛車兜風，有晚他如常駕車出外，返回上水雙魚河St. Andrews Place獨立屋豪宅時，引擎發出的隆隆哮聲雖未至於聲大如雷，但其低頻容易震動旁邊事物，加上屋苑屬低密度豪宅，甚為寧靜，令聲音更響徹，故他駛經鄰居時，鄰居的女兒被引擎聲嚇親，為免影響鄰居，黎明不惜忍痛將愛車低價出讓。

送果籃賠罪

黎明接受記者訪問時，承認賣車與鄰居有關，他表示當日見鄰居太太在哭，即上前詢問︰「鄰居位太太喺度喊，我停車問佢咩事？使唔使幫手？但佢欲言又止，只係吞吞吐吐咁話︰『黎生，唔係幾好意思開口同你講。』我再三追問，佢先話︰『每次你開車出入都好響，我個女好驚呢種聲，每次聽到都會喊！』」

一心駕駛愛車兜風的黎明，沒想到會造成鄰居不便，故即時致歉，翌日更送上果籃「賠罪」，他說︰「第二日訂咗個果籃送畀小妹妹，其實當晚聽到件事之後已經覺得唔好意思，即場向對方致歉。架車雖然好鍾意，但出入會影響其他人，自己又唔會搬走，諗咗一陣，決定忍痛賣車。」

火速覓「新歡」

雖然這架法拉利屬搶手貨，加上訂購需時，基本上要等一年半至兩年時間，故有價有市，但黎明為免夜長夢多，寧願以低價賣給車行，他說︰「今次賣車冇賺，蝕少少，如果私人放或賣畀相熟朋友，應該唔會點蝕，但我唔想浪費時間，唔想再嚇親小朋友！」賣車後，他火速物色「新歡」，據知早前再擲逾400萬元購入Bentley名貴跑車，其引擎比法拉利跑車靜一倍，明顯選新車條件是以不影響別人為先，認真抵讚！