佘詩曼接內地Job 帶齊消毒用品

佘詩曼昨日為環保活動到柴灣拍攝宣傳照，對於內地H7N9禽流感肆虐，她說：「我細佬喺上海做飲食業，我有叫佢小心啲，但冇得話叫佢唔好做。（內地人對抗疫症好Hea？）唔係嘅，香港都有人上咗去研究吖！我會照接內地活動同剪綵工作，帶埋口罩同消毒用品上去，最緊要注重個人衞生，增強抵抗力。（避開上海同杭州？）唔會，但呢啲地方都冇搵我。」此外，她承認與無綫有傾合作，問到是否拍曾志偉監製新劇？她說：「有傾過吓，但傾嗰陣古仔都未定實年齡層。（去now拍梅小青新劇？）初步傾過吓，未定。」

問到陳山聰傳與何超雲分手，阿佘說：「係咪真o架？我唔知人哋嘅嘢，等我問吓佢！（山聰乜都冇？）有冇咁慘呀？或者好Sweet呢！（你感情如何？）等待中，追求者梗有o架！（富二代？）唔啱我，太年輕。」