Kelly憂蝦餃仔中招

H7N9禽流感在內地的疫情愈趨嚴重，導致人心惶惶，即將到內地工作的陳慧琳卻不太擔心，亦不會因此停接內地工作，但會隨身攜帶消毒洗手液。不過，身為兩子之母的她就比較擔心寶貝仔的健康。

陳慧琳（Kelly）將為雷頌德（Mark）6月舉行的作品展擔任嘉賓，昨日二人會見傳媒，提到近日H7N9的疫情，身為兩子之母的Kelly表示有留意：「之後我都有啲工作會返內地，會繼續去，亦唔會停接內地嘅工作，因為自己唔係驚得咁緊要，嗰時香港都係咁，嗰陣沙士之後都習慣帶消毒洗手液喺身，反而驚小朋友多啲。」同樣身為爸爸的Mark認為目前是非常時期，家長應做好本分，若小朋友感到不適便不要讓他們上學，Kelly即點頭認同：「係呀！唔好諗住戴口罩就冇事，一定惹到人，小朋友抵抗力差啲，好多病都係喺學校惹番嚟！」她又表示已教導大仔劉昇（蝦餃仔）要勤洗手：「細仔就好啲，因為佢唔出街，而蝦餃仔放學返屋企就要洗手、洗面同換校服。」

曾畀Mark鬧到喊

另外，Mark的作品展邀請Kelly、黎明及衞蘭等歌手擔任嘉賓，他透露屆時亦會有神秘嘉賓，並已設計好Kelly的演出部分，問到二人會否合唱？他說：「我哋有《紀念日》，仲有老朋友（馮德倫）出嚟唱一唱，好耐未試過一齊，應該有十幾年啦！」雖然Kelly與Mark合作多年，但原來當初Kelly第一次見到Mark時相當害怕：「第一次見佢好驚，因為佢唔出聲好惡，一講嘢就覺得佢冇嘢。（試過畀佢鬧？）都有少少。」Mark即自辯：「唔係，係佢眼淺，嗰啲唔算鬧。（試過鬧到佢喊？）佢好易喊，係訓話啫！開頭大家都唔識嘢。」