哨牙仔蕭正楠冧賀何傲芝牛一
藝員何傲芝下星期二29歲生日，緋聞男友蕭正楠、妹妹何傲兒及好友陳敏之、袁偉豪和王浩信日前為她送上驚喜生日派對，她說：「原本嗰晚約咗大家食飯，點知去到升降機口，佢哋已經企晒喺門口唱生日歌歡迎我！」問到是否「好朋友」蕭正楠精心安排？她笑說：「唔係，係成大班朋友一齊安排嘅。」近期在《仁心解碼II》扮演哨牙仔出晒位的蕭正楠，出動招牌哨牙整古做怪博紅顏一笑，眾人又齊齊扮哨牙仔搞笑自拍，氹到何傲芝冧笑。不過她透露生日當天沒有預蕭正楠一份，問到可會心急嫁人﹖她說：「仲未，起碼三十幾歲啦！」
