樂仔疫區返即約Kary開餐

人類感染變種禽流感H7N9肆虐華東地區，余文樂上月底因在上海開工多日而成為「危險人物」，幸而他返港數天仍龍精虎猛，女友吳雨霏心急見愛郎，無懼樂仔七日潛伏期未過，前晚相約到銅鑼灣開餐。

華東地區又確診H7N9禽流感個案，疫情且有南下趨勢，令港人高度關注。然而，余文樂上月到上海與楊冪拍攝新片《微時代之戀》，雖然他早於上月31日從滬返港，沒有出現任何流感徵狀，可是有專家指H7N9潛伏期長達七天，至今潛伏期未過，變相令樂仔成為「危險人物」。儘管如此，但與吳雨霏（Kary）的戀情爆出後，兩口子聚少離多，Kary為爭取時間與愛郎見面，前晚還是相約到銅鑼灣撐枱腳，與樂仔一起抗流感。

戴兩個口罩

本報昨日致電樂仔，對於變成高危一族，他強調絕不擔心：「我上月底返嚟嘅，毋須隔離，我喺上海都只係喺酒店同片場，冇周圍走，不過下個星期一要去深圳同Angelababy出席活動！」他強調向來注重個人衞生：「真係冇擔心，一向注重衞生，香港十年前經歷沙士，意識已經高咗，無論出埠定去人多嘅地方，都一定戴口罩，有時覺得一個口罩唔夠就戴兩個，同事都有戴！希望疫情可以好快控制同冇事，唔舒服就要即刻睇醫生！」樂仔透露即將要到歐洲開工一個月，故完成下周深圳活動後，暫不須返內地開工。

樂仔返港後依然精壯，前晚更親自駕駛價值逾340萬港元的戰車接女友開餐，印證Kary地位。樂仔先到跑馬地接女友，然後開車往銅鑼灣開平道一號放低Kary上餐廳，泊好車後才折返餐廳撐枱腳。雖然晚飯只得45分鐘，但樂仔似乎食得好滿足，先行落樓取車時，被問到是否跟女友食飯？他爽快地說：「係！（問Kary喺邊？）喺上面，因為工作我要趕住走！」

被擋路不悅

5分鐘後，Kary離開餐廳，只見她嘴角含春，問到為何那麼快離開？她說：「食完咪走囉！」但問到戀情已公開，為何樂仔沒有送她一程，Kary即時面都紅晒，並笑着示意不回應，然後走到停車場登上樂仔的戰車。當記者一擁而上拍照時，雖然「樂霏」大方任影唔嬲，但樂仔見記者擋着去路，臉帶不悅地說：「唔係話唔畀你哋影呀！你哋咁攔住車頭影，你哋又危險，我開車又難！」身邊的Kary即識做勸男友不要激動，有女友呵番，樂仔即時面露笑容，隨即送Kary返回跑馬地寓所，其後獨自離開。

樂仔前晚亦於微博談及開餐一事，又以「佢」來形容Kary，足證已認定對方身份，他昨日在Instagram留言：「No Pain No Gain（沒有不勞而獲）！」未知是否勉勵自己要小心經營這段感情！此外，昨晚他出席劉偉強生日派對，並指沒因被拍得和Kary撐枱腳而不快：「預咗畀人影，不過突然間有個人殺出嚟，我驚煞唔切車有危險。」