許佩老師病逝 松哥見最後一面

歌唱老師許佩前晚因心臟衰竭在港逝世，年過九十的她門生眾多，包括謝賢、劉松仁、關菊英和米雪等，他們均表示相當敬重及愛錫老師，老師亦對他們愛護有加。謝賢坦言對方舉殯時一定會去鞠躬：「我係佢最後一個門生，聽聞幾個月前本來有個生日會，但唔知點解冇搞到，不過佢都年紀大，屬於笑喪，就嚟我都跟住去喇！不過都仲有十幾年。」趕及見老師最後一面的松哥昨日已前往天津，他說：「尋日探佢都仲幾好，精神唔錯，點知我接到米雪嘅消息話佢過咗身，同佢不嬲有聯絡，當佢好似阿媽咁，仲諗住再出嚟打吓麻雀，真係好突然，所以老人家想見就要見！」而菊姐表示近日較忙碌，故個多星期沒有聯絡老師：「佢都90歲，之前佢生日，大家知佢唔係咁舒服，淨係去佢屋企探佢，我都覺得好突然。」兩星期前探過老師的米雪指對方如家長一樣，很愛錫他們。