熊黛林睇騷High爆

與郭富城（Aaron）愛得癡纏的熊黛林（Lynn），前晚高調現身力撐男友第二場紅館個唱，更不斷揮動螢光棒High到爆。而城城亦隔空大出冧招，大唱情歌示愛，又刻意駐足向女友揮手！

城城與Lynn相愛六年多，去年初城城開騷時，二人在逾萬名粉絲前進行「世紀一握」，感情更進一步。雖然近日城城與無綫咪神苟芸慧傳出緋聞，但Lynn似乎未受緋聞影響，前晚攜同母親現身男友在紅館舉行的第二場個唱，以行動力證戀情不變。據知，Lynn今次親自畀錢買貴飛力撐城城，雖然揀選的位置並非最貼近舞台，但依然無損興奮心情，一開騷即化身小粉絲，不停狂Fing螢光棒，又企足全場，不時向城城揮手打招呼，更拎起手機幫男友拍下台上英姿，High到爆！

刻意停步揮手

而城城亦非常識做，當行到Lynn身處的位置向一眾粉絲揮手時，本來打算轉身落樓梯的他，似乎發現女友在場，便刻意停步駐足，更再一次主動向Lynn身處的方向揮手，引得女友不斷甜笑，擺到明隔空出冧招！而正因為城城刻意停步揮手，令更多「城粉」發現Lynn在場，引發一連串歡呼聲，即成為全場焦點！

獲女友力撐的城城在台上風騷不停說：「I Love You！」令Lynn不斷甜笑，明顯對男友的愛意照單全收！此外，城城首度獻唱親自創作的歌曲《脈搏》，叮囑粉絲留意歌詞，借機向Lynn隔空放電！完場後，Lynn拖實母親離場，雖被大批「城粉」圍住要求合照，但仍邊行邊保持微笑，更細心叮囑他們小心落樓梯。

另外，Lynn昨日出席Moiselle專門店開幕酒會時，繼續春風滿面，談及城城在騷上大講「I Love You」時，即甜笑說：「邊有呀，揮手就有，有唱歌囉，其他就冇！（個心收到？）大家都收到，佢對住咁多人唱！」她又否認帶母親到個唱是宣示主權，但提到會否怕「七年之癢」時，Lynn說：「我個心唔癢！（怕城城癢？）乜都好好！」對於近日城城與苟姑娘傳緋聞，她更非常信任男友：「明眼人一睇就知係乜，佢好唔得閒，有時間都瞓啦，我點會喺佢咁忙時問佢無聊嘢！（會叫佢避忌吓？）有時有人特登做啲乜嘢都防唔到，但今次個女仔好慘！」