童年燒傷留陰影 古天樂真火拍戲呻被騙

型男古天樂昨日與李心潔及張兆輝出席新片《逃出生天3D》記者會，古仔即大呻被騙。事緣對火有童年陰影的古仔向導演表示怕火時，導演竟騙他指戲中的爆破場面全是3D效果，到「入局」後才驚覺是玩真火，古仔說：「我六、七歲嗰時試過玩燈籠燒親，燒傷咗對腳，啲頭髮、眉毛同眼睫毛都燶晒，要去醫院敷足半年藥，到依家都仲記得嗰種痛，所以我都要求電影公司買保險！（保險買重身體邊部分？）忽忽都買！身體所有部分都咁重要。」

至於李心潔則自爆新片導演兼老公彭順毫不憐香惜玉，她說：「其中一場戲佢嫌啲火唔夠大，仲叫人加火，我企咗喺火堆三、四分鐘已經頂唔順，未嗌Cut就走開。」她又透露曾因穿高跟鞋拍攝逃跑戲而跌傷。