阿澤寸阿Sa玩埋古仔

杜汶澤近年信佛後一改口多多性格，但最近事業升呢再度「嚟料」，昨日他出席記者會時繼續把口唔收，在新片演活尖酸口衰經理人的他取笑蔡卓妍（阿Sa）身材平板、鄭希怡似人妖、古天樂演麻甩佬戲，又向經理人Mani說：「依家你做訪問定我呀？」獲揼本做監製的阿澤更揚言會力捧阿Sa做影后！

向來口水多多的杜汶澤近期事業升呢，炮製的電影《低俗喜劇》大收旺場，年初更贏得「香港電影評論學會」的最佳男演員，近日又獲揼本成立製作公司做監製，甚為風騷的他再度回復口多多本色！

阿澤、蔡卓妍及鄭希怡（Yumiko）主演的英皇電影《超級經理人》昨日在《香港國際影視展2013》舉行記者會，老闆楊受成亦有出席，飾演尖酸刻薄經理人的阿澤在台上角色上身，狂寸Yumiko、阿Sa及經理人霍汶希（Mani），他先對着Yumiko說：「你係全港第一個變性經理人，我見你同人妖合照好開心！」玩遊戲時他指着經理人特質的形容詞搞氣氛，例如「耐力驚人」、「犧牲色相」及「口臭」等：「做乜將Mani啲嘢寫晒出嚟？佢都想犧牲色相，不過冇人要！」又取笑阿Sa身材如平板：「唔玩邊有得笑！」難得三女仍大方陪笑！阿澤又再發功辣埋古天樂：「我戲入面畀好多女仔摸，以為古天樂咁靚仔先有，點知佢依家拍親都係麻甩佬戲，邊有我咁好艷福！」

開戲力捧做影后

事後阿澤在Mani陪同下受訪，原本Mani打算解圍，可是阿澤繼續口多多：「依家你做訪問定我呀？」Mani說：「我驚人哋誤會你啫！」阿澤轉軚說：「今次呢個角色唔係影射Mani，係直射佢！你估做經理人做得咁成功咁易呀？（踩完又讚？）我不嬲一啖雞屎一啖糖。」

提到成立製作公司後會開戲力捧阿Sa，他笑說：「唔好咁講！我靠佢搵食呀！想將舞台劇《29+1》拍成電影版畀佢發揮！」他又表示新片明年才上映，因覺得《一代宗師》主角梁朝偉及章子怡必掃帝后，希望打造阿Sa瞄準下屆影后。

減片酬撐港產片

Mani亦承諾谷阿Sa在影壇贏獎，受寵若驚的阿Sa說：「好大壓力喎！唔好話影后啦！攞終身成就獎得唔得！不過我都想有更好角色發揮演技。」Mani爆阿Sa願減片酬三至四成以支持港產片，又指有性感內衣品牌曾找她代言，再被嚇怕的Sa說：「小童內衣呀！咪嚇親人，我驚要賠錢！」

此外，昨日阿澤在Facebook留言：「最近有很多人說我像以前一樣很寸、得罪很多人，太太和經理人不約而同提醒我要低調……前幾年沒人找我拍戲，日日在家中，那時候便沒有是非，做人真難，不知道大家到底想我怎樣。」