高海寧珍藏 世界盃VIP襟章波飛

無綫「咪神」高海寧（高Ling）原來是個熱血球迷，2010年一嘗主持滋味，為無綫的南非世界盃節目做現場主持，與一班台前幕後入場睇波，支持心愛球隊西班牙，更帶旺西班牙捧盃！能夠入場感受氣氛，每張入場券對她來說都是珍藏品：「由初賽16強到決賽嘅飛我都有Keep住，我都覺得好彩！其實有得入場已經好興奮，加上我係西班牙隊嘅Fans，可以見證佢哋第一次入決賽同埋捧盃，好難得。」

除入場券外，高Ling亦有儲起當時的VIP襟章：「本來我哋唔係每場都有得入，不過好好彩喺當地識到一個China Town太子爺，佢同佢女朋友都好好客，仲幫我哋搵到當地人先買到嘅飛，連啲襟章都係VIP先有！每個襟章都有齊所有唔同嘅吉祥物同世界盃標誌，好有紀念價值。」