麥貝夷鍾一憲大格鬥

最近傳不和的歌手鍾一憲（Jason）與麥貝夷（Karene）終忍不住大打出手！原來他們正習武互相切磋，跆拳道高手Jason過往奪獎無數，雖然因拉爆筋「功力大減」，但學起詠春仍似模似樣！至於Karene近月苦練泰拳，希望成功消脂及做打女！

情侶檔歌手鍾一憲（Jason）及麥貝夷（Karene）最近被指面左左，日前終在武館大打出手，兩人擺起對打甫士時殺氣騰騰，莫非真的不和？其實兩人只是切磋武技而已，曾是跆拳道高手的Jason闊別多年再度習武，Karene近月則苦練泰拳，希望成為打得之人。

操練過度大腿筋裂

因武館提供不同武種的課程，甚至擺放各種兵器，疑似過度活躍的Jason及Karene非常好奇逐樣「搞搞震」，更突然飛身攬沙包扮樹熊，令人啼笑皆非！Karene更要求導師陳志忠（Wilson）教她防狼自衞術，Jason自薦扮「色狼」，但因Karene未能即時掌握要訣，武功底較深的Jason反而教她打自己，場面搞笑！

Jason小學開始學跆拳道，甚有天分的他曾贏得不少比賽，他笑言是「遇神殺神」：「自細同細佬好鍾意打交，媽咪見我哋咁鍾意自相殘殺，就送我哋學跆拳，我好快就贏到套拳同搏拳冠軍！當時我仲係小學生，已經被送到深圳大學同人打！」可惜好景不常，當他考獲紅黑帶準備考黑帶時，因操練過度令大腿內筋撕裂，休養多年仍未恢復當年勇，這日Jason跟Wilson學習詠春，重拾當年感覺，擺出小念頭起手式、日字衝拳及撐腿等功架十足，獲Wilson大讚。

近幾個月Karene開始苦練泰拳：「我由細到大唔協調，所有運動肥佬，近排希望試吓拍戲，所以學泰拳練多啲動作，又可以強身健體！前排我水腫，好多人話我學咗泰拳後瘦咗好多呀！真係一舉幾得。」她又指Wilson教的防狼術十分使得，因她早前在地鐵遇上鹹豬手，被癡漢全程緊貼身後，若早日學懂自衞術便可懲戒色狼。

防狼4部曲

除詠春及泰拳等傳統武藝，不少女士亦會學自衞術，用以保護自己以免被「鹹豬手」，Jason今次暫時扮演「色狼」，讓Karene示範防狼法，姊妹學嘢喇！