躁底Justin甩褲爆粗

繼生日周連日夜蒲溝女兼搞唔成派對，以及日前開騷遲大到及因病入院，加拿大小天王Justin Bieber前日又於酒店門外爆粗鬧記者，一度被保鏢阻止動粗，難怪他自言這是「艱難的一周」！

周四因呼吸問題而入院的Justin，前日未有取消於倫敦的最後一場騷，似乎一心為日前晚晚夜蒲、開騷遲到及大牌行為等「洗底」，不過Justin出院後於周五步出酒店，準備上保母車時，聽到記者爆粗叫他「滾回美國」，即沉不住氣衝落車爆粗問對方：「你講緊乜X嘢？」又以手擋對方鏡頭，表示會「打X佢」，幸而同行的保鏢攬實他阻止動粗。惟保鏢秤起身形「嬌小」兼甩褲的Justin時似足爸爸抱仔，場面搞笑。

雖然Justin近期負面新聞多多，但仍獲美國名嘴皮爾斯摩根（Piers Morgan）留言力撐，不過粉絲卻誤以為他踩Justin而鬧爆他！而Justin事後亦即於Twitter留言：「有時全日畀人用鏡頭隊住塊面，又不停講難聽嘅嘢針對！」慨嘆這是「艱難的一周」，又續指要專注當晚的演出，似乎已經收拾心情。而他後來更向媽媽Pattie Mallette留言表示，他雖然不完美，但會嘗試努力。

「財」子被指不孝

另外，著名雜誌《Parade》公布紅人明星去年收入，Justin勁賺約4.3億港元，緊接鄉謠小天后Taylor Swift之後成亞軍，不過有指他早前拒絕為媽媽新書拍封面而與對方吵大鑊，似乎略嫌不孝。