林紫君輸波罰選美

亞姐出身的林紫君，與籃球甚有淵源，除了最大嗜好是打籃球外，她參選亞姐亦是因為輸了一場籃球賽，更搞笑的是她在亞姐的才藝環節中也是表演打籃球，可謂前無古人！

樣子甜美的林紫君，2009年參選亞姐入行，穿上泳裝騷身材時性感迷人，想不到私下原來是「男仔頭」一名。熱愛打籃球的她，無論走籃、傳球甚至以手指轉波等都毫無難度，訪問當日，身穿公仔T恤及短褲的她，連坐在草地上聊天都冇時停，與滿街有「公主病」的少女相比，紫君的好動、爽直更顯得難能可貴！

「米芝蓮」怕水着

嗜好還嗜好，膽粗粗的紫君竟在亞姐的才藝環節中表演打籃球，簡直是前無古人！不說不知，原來她當初選美的原因亦是因為籃球：「我Form 5考完公開試之後好得閒，所以同個Best Friend去打波，我哋用一場籃球賽賭，輸咗嗰個要承諾對方做一件事，點知我嗰組輸咗1分，咁啱當時港姐招募，佢叫我去選，但我話咁多人唔好啦！之後佢又話亞姐開始報名，我就答應咗。」好友極高效率地為她在網上登記，1星期後，她已收到第一次面試通知。

談及那次面試，紫君坦言印象深刻：「嗰次喺亞視錄影廠有3百幾人同我一齊面試，仲要着三點式，我即刻『吓』咗一聲！你知啦！好似一個米芝蓮咁嘅身形，冇可能着三點式，不過我諗由3百幾人揀50個，冇可能揀到我！」怎料命運注定她得到第二次面試機會，這次經歷令她更難忘：「今次要喺商場入面着泳衣表演畀人睇，當時我想死，真係想死！因為我去泳池、海灘都係着一件頭嗰啲鯊魚戰衣，最慘就係畀我個體育老師見到，仲要打電話畀我讚我身形幾靚囉！」

懶理媽咪反對

不過，林媽媽的反應則剛剛相反，非常反對，紫君說：「阿媽知我參選後猛話『黐線！做乜選！』，我同佢講已經簽約，唔選要罰錢，佢先妥協話『選啦！』，不過佢之後日日都話做咩唔讀多啲書，仲話要參加就參加港姐，我同佢講喺亞視比喺無綫好，TVB太多人喇！人際關係好複雜，亞視比較有人情味。」