Bobby收膠喉驚到震

藝人歐陽震華（Bobby）在大年初三凌晨因急性肺炎而入院，昨日他終於復工拍攝新劇，好拍檔關詠荷更特地送上一條膠水喉，寓意他不要再插喉。

歐陽震華、關詠荷、敖嘉年和黃智雯等昨日為劇集《情逆三世緣》開工，劇組特地送了一張心意卡和兩盒雞精給大病初愈的Bobby，而好友荷姐則送了一條膠水喉給他並說：「我代表你太太同Fans送畀你，警誡你唔好再將啲喉放入口。」住院時全身插滿喉的Bobby，甫見膠喉即驚慌問是否尿喉，他又笑說：「依家一見到喉就驚。」

口花花搵內地看護

對於首日復工，Bobby十分開心：「監製好錫我，依家每日只開一組，夜晚11點前會返屋企。」精神甚好的他中氣十足地表示已回復昔日身形，問到下月到佛山拍外景會否帶同看護時，他即口花花說：「唔使啦！內地大把年輕貌美嘅看護。」其後補鑊說：「係男看護呀！老婆都會去，其實呢排都令佢受驚喇！我要愛錫佢多啲。（點錫法？）一日攬住佢嚟錫，我哋從未試過咁恩愛。（錫出BB？）下一Round啦！我想生個龍B，生唔倒就收養啦！都係年輕貌美嗰啲。」

Bobby又大晒恩愛表示老婆有特地為他準備愛心早餐：「係佢包嘅雲吞同腸粉，雖然九唔搭八，但愛心係最緊要。」而關詠荷對於老公張家輝乃今屆金像獎影帝大熱，她笑說：「平常心啦！頒獎禮當日我唔喺香港，不過我個心長年都為佢打氣。」