林熹瞳驚亂倫擇偶求眼細

藝人林熹瞳（Rachel）集演員、製作公司總監、編劇及剪片師於一身，一人分飾多角的她說：「我諗藝人兼顧埋幕後工作會係種趨勢，我好怕做死同一類工作，所以喺兩年幾前機緣巧合下，參與咗一間製作公司嘅策劃工作，而且愈做愈覺得比想像中好玩同有挑戰性，令我更有推動力做好製作公司總監一職。」

兼顧剪片工作的她，原本不懂剪片，她說：「有次要趕條Trailer（預告片）用，可能我鍾意睇戲，我將好多電影記憶套番落去，睇過嘅人都讚。近期我就忙編緊個300集嘅動漫劇本，黃玉郎睇過初稿，唔信我係初哥。（身份太多，冇時間拍拖？）咁又唔係忙到冇時間剩，可惜我仲喺約會階段，等緊真命天子。我鍾意有才華、專一同幽默嘅男士，而且要眼細，因為我阿哥眼大，我唔想有種亂倫嘅錯覺，不過就算只符合頭兩項條件，我都好滿足！」