盈盈臨生飲汽水狂吔

懷胎近十個月的準媽咪湯盈盈，日前挺着巨肚，與老公錢嘉樂及父母到灣仔開餐食海鮮，雖然她早前因超磅而戒甜品，不過臨盆在即的她晚餐時竟大吃大喝兼飲汽水，認真唔聽話！

錢嘉樂與湯盈盈相戀五年，於去年11月奉女成婚，正式拉埋天窗。腹大便便的盈盈隨即停工養胎，而嘉樂亦密密接Job搵奶粉錢。向來擁有苗條身段的盈盈，因佗B而胃口大增，暴增60磅，令身形變得圓潤，上圍亦豐滿了不少。早前盈盈自爆被醫生指超磅而勸告戒口，她為了愛女，決心放棄最愛的甜品。

雖然已戒甜三個月，但臨盆在即的盈盈正餐卻沒戒口。日前約晚上8時，戴住情侶眼鏡的盈盈樂樂，現身銅鑼灣駱克道街頭，未幾見盈盈的父母前來會合，其後一行四人步行往灣仔方向，樂樂全程拖實老婆。眾人行至灣仔一間辣蟹海鮮食店開餐。樂樂甫進店即細心為老婆清洗食餐具，非常體貼。席間他們點了多款招牌菜，當中包括辣蟹，而預產期在本月的盈盈竟然不戒口，胃口甚佳，冰凍的可樂亦照飲，認真唔聽話！

對於太太沒有戒口，愛妻心切的錢嘉樂全部攬上身！他受訪時說：「佢冇食辣蟹，只係食小菜，汽水係我飲嘅，都係畀佢飲兩啖過口癮，咁多老人家在場，大把人睇住佢啦！（老婆就快生？）好緊張！依家只敢接剪片嘅工作，可以隨時陪佢生嘛！我模擬咗入院過程同路線，唔會出錯！」

擔心難收身

另一邊廂，盈盈昨晚出席劇集《老表，你好嘢！》慶功宴，挺着巨肚的她仍步履輕盈。她表示打算餵人奶：「預產期喺今個月17號，BB已經改咗英文名Alyssa，中文名等老爺改。（準備好BB用品﹖）冇呀，羅敏莊叫我唔使買，有一袋BB衫。（升咗Cup？）好開心呀！好勁。（驚唔驚收唔到身？）驚㗎！手指腫到結婚戒指都戴唔到。」她透露錢嘉樂已停工陪她待產，問到產後會否減產？她說：「頭一年會㗎！要環遊世界。（帶埋BB？）老公唔畀。（趁機造人？）去嗰啲地方唔啱，會去非洲。」